Warszawami Mette F.-ip Donald Tusk Ukraine pillugu oqaloqatigissavaa
EU-p siulittaasuuffia Danmarkip Polenimit 2025-p affaani kingullermi tigussavaa. Ataasinngorpat ministeriuneq tikeraassaaq.
Annonse
Ukrainemut EU-mullu tapersersuineq eqqartorniarlugu ministeriunerup Mette Frederiksenip (S) ataasinngorpat Polenimi ministeriuneq Donald Tusk tikeraassavaa.
Tamanna ministeriunerup allaffianit tusagassiuutinut nalunaarummi nalunaarutigineqarpoq.
Danmarkip 2025-mi ukiup affaani kingullermi Poleni kingoraarlugu EU-mi siulittaasunngorniarnera sioqqullugu tikeraarpoq.
Ruslandip saassussileruttornera sakkussianillu annertuumik annertusinera takusinnaallugu Mette Frederiksen tusagassiuutinut nalunaarummi oqarpoq, taamaattumillu Europa isumannaallisaanerminik akisussaaffimmik nammineq tigusisariaqarnerarpaa:
- Illersornissatsinnik nukittunerulersitsiniarluta Ukrainemullu sakkussianik tapersersuinermillu annertunerusumik qulakkeerinninniarluta iliuuseqartariaqarpugut. Poleni tamatumani siuttuusimavoq, tamannalu tamatta isumannaatsuunitsinnut iluaqutaavoq, ministeriuneq oqarpoq.
Nukissiornikkut isumannaatsuuneq mingutsitsinnginnerunerlu oqaluuserineqassapputtaaq, tamanna tusagassiuutinut nalunaarummi takuneqarsinnaavoq.
Østersømi nukissiornermut ataavartussamut aningaasaliisoqarnerusariaqartoq Mette Frederiksen oqarpoq:
- Polenimik qanimut suleqateqarnitta ingerlatiinnarnissaa pingaaruteqarpoq, tusagassiuutinut nalunaarummi oqarpoq.
Ataasinngormat Argentinap præsidentianit Javier Mileimit Mette Frederiksen tikeraarneqartussaagaluarpoq, tikeraarnissaali taamaatiinnarneqarpoq. Taamaattumik nammineq angalarusuppoq.
EU-mi nunat ilaasortat siuttuinit aamma EU-mi Kommissionimi siulittaasuusumit ilaasortaaffigineqartumi Europami Siunnersuisoqatigiinni Donald Tusk præsidentiusimavoq. Illuatungiliuttooreerluni siorna Polenimi ministeriunertut qinigaaqqippoq.
Ruslandip aarlerinartorsiortitsinera Mette Frederiksenip Donald Tuskillu ilungersunartutut oqaatigisimavaat.
Assersuutigalugu marsimi aviisinut arlalinnut, ilaatigut Spaniami El Paísimut Tysklandimilu Die Weltimut, Europami sorsunnersuup kingulliup kingorna aatsaat taama sakkutooqarnikkut akerleriittoqalersinnaanera aarlerinartoqartigisoq Tusk oqarpoq.
- Qanorluunniit pisoqarsinnaanera maannakkut ernumanarnerpaavoq. 1945-mili taamatut pisoqarsimanngilaq.
- Nalunngilara tamanna nikallornarsinnaasoq, ingammik inuusunnerusunut, piffissalli nutaap aallartinneranut sungiussiniartariaqarpugut, oqarpoq.
/ritzau/
