Unioqqutitsilluni biilinik angallassinerit arlallit politiinut tunniunneqarsimasut

Internetikkut gruppit isertortut aqqutigalugit biilinik angallassinissamut allagartaqanngitsut unioqqutitsillutik aningaasarsiortalersimasut, Nuuk Taximi pisortaq Janus Elgaard oqarpoq.

Janus Elgaardip oqaatigaa, taxatut angallassisut peqquserluttut ajornartorsiutaaneruleraluttuinnartut, taxanik ingerlatsisut aningaasarsiarisinnaasaralutik annaasalermatikkit. Tamanna peqqutigalugu taxanik ingerlatseqatigiiffiup Nuummi politiinut ukiaq nalunaarutigisimavaa.

Politiit uppernarsaapput

- Kalaallit Nunaanni Politiit uppernarsarsinnaavaat Nuuk Taximit 22. oktober 2023-mi nalunaaruteqartoqarsimasoq Facebookimi gruppi matoqqasoq aqqutigalugu taxatut iliorluni angallassisoqarsimasoq. Suliaq suli paasiniarneqarpoq, Kalaallit Nunaanni Politiini attaveqaqatigiinni immikkoortortaqarfik ilisimatitsivoq.

Taxaatileqatigiiffiup pisortaat naapertorlugu Facebookimi gruppi matoqqasuuvoq, akuersissummik tunineqanngitsumik taxanik angallassinermik ussassaaruteqartoq, 3000-it missaannillu ilaasortaqarpoq.

- Isumaqarpunga illoqarfiit pingaarnersaanni inuppassuit gruppi nalunngikkaat. Kinalu taakkuninnga atuisimanerminik miserratiginnissinnaannginnerpa, Janus Elgaard aperivoq, taannalu oqarpoq taxaatileqatigiiffimmi ingerlatsisut ullut tamaasa taakkuninnga naapitaqartartut.

Taassuma erseqqissarpaa ajornartorsiut tamanna akileraarutitigut isertitassanik annaasaqarnermik pissuteqarluni naalagaaffiup karsianut sunniuteqaannarani, aammali pinerlunniarnikkut akileraarutinik akiliisartut eqqumaffigisariaqaraat sillimmasiisarfiit ajutoortoqarpat allatut qisuariarsinnaanerat allaasinnaasartoq.

Atuisut isumannaatsuunissaat

- Aquttartut tamaasa ataasiakkaarlugit nalilersortarpavut, aamma pinerlussimannginnerat misissorneqartarpoq. Taamaasiortarpugut atuisut isumannaatsuunissaat qulakkeerniarlugu, taxatileqatigiiffimmi pisortaq nassuiaavoq. Taanna Facebookimi gruppemi matoqqasumi ilaasortanngorsimagaluarpoq, kingornalu pisortaasoq paasineqarmat peerneqarsimalluni.

Janus Elgaard nassuiaavoq ajornartorsiut tamanna ilaatigut unnukkut imerniartarfiup Daddys-ip eqqaani Nuummi illoqarfiup qeqqaniittumi malugineqarsinnaasartoq.

- Takusarparput taxatut unioqqutitsillutik ingerlatsiniartut mobilimi skærmini oqaatsimik „FRI“-mik pisuinnarnut takutitsiniartartut, Janus Elgaard oqaluttuarpoq.

Taassuma neriuutigaa unioqqutitsilluni akiliisitsilluni biiliussisarnerit unitsinniartoqassasut ajutoortoqannginnerani, taamaattoqartillugumi atuisut sillimmasiinermut tunngasunik ajornartorsiuteqalersinnaammata. Ilanngullugu kaammattuutigaa biilinik attartortitsisartut unioqqutitsilluni taxatut ingerlatsiniartartunut mianersornerulernissaat.