Unammillerneq kikkunnut ajoqutaassagami?

Kalaallit Nunaanni illoqarfinni anginerusuni innuttaasut akiligassanut annerusumik akiliisarput illoqarfinni mikinerusuni innuttaasut kiffartuunneqarnissaat periarfissaassammat.

Atassutip siulittaasua Aqqalu C. Jerimiassen nunaqarfiit internetimut »akisuumik ajortumillu« attavillit Starlinkimik atuinissaannik partiip arlaleriarluni siunnersuuteqartareernerata kingorna oqallisissiani arlalinni oqarpoq. Innuttaasut internetimik akikinnerusumik atuinissaannut siunnersuut iluaqutaasinnaasoq partiip siulittaasua isumaqarpoq.

Attaveqaasersuutinut Naalakkersuisoq Hans Peter Poulsen (S) akerlinganik isumaqarpoq, tassa Kalaallit Nunaat unammillernermut ammaassinissamut mianersussasoq.

– Pilersuinermik qulakkeerinninnermut, nalunaarasuartaatitigullu attaveqaateqarnitsinni tamarmiusumi aningaasaqarnermut eqquinerlussinnaasumik unammilleqatigiilersitsinissarput mianersuutissavarput.

Taakkua eqqorneqassappata sullissinerit ilaat, matumani oqarasuaateqarneq ilanngullugu, annaassavagut. Taassumap aamma kingunerisaanik nalunaarasuartaatitigut attaveqarnivut nunani allani soqutigisaqaqatigiinnit nakkutigineqalissapput, tusagassiuutinut nalunaarummi oqarpoq.

Atassutip siulittaasuata tamanna paasisinnaanngilaa.

– Unammillerneq kikkunnut ajoqutaassagami? Aqqalu C. Jerimiassen aperivoq.

Nalunaarasuartaatitigut niuerneq sunnertiasorujussuuvoq

Nalunaarasuartaatinut tunngatillugu niuerneq Atassutip kisimi samminngilaa. Attaveqaatinut internetsimullu tunngatillugu niuernermik allanik, ilaatigut Starlinkimik, ammaassinissaq Naalakkersuisut qanoq isumaqarfigineraat Naleqqap siulittaasuata Pele Brobergip, Demokraatillu siulittaasuata Jens-Frederik Nielsenip aamma tusarusuppaat. Attaveqaatinut unammilleqatigiinneq ammaanniarneqarnersoq Jens-Frederik Nielsenip §37 naapertorlugu apeqqutini arlalinni apeqqutigaa.

Hans Peter Poulsenilli Demokraatit siulittaasuat pakatsisippaa. Nalunaarasuartaatinut niuerneq attaveqaatinillu pilersuineq sunnertiasorujussuummat pilersuinerup innarlerneqaqqunagu suliniuteqarnissaq mianersuutigisariaqartoq naalakkersuisoq allappoq.

– Qaammataasiaq atorlugu kiffartuussinermik Kalaallit Nunaanni ammaassinissaminnut Naalakkersuisut pilersaaruteqanngillat, ammaassisoqaraluarpammi tamanna Kalaallit Nunaanni nalunaarasuartaatitigut attaveqaateqarnermi tamarmi aningaasaqarnermut pilersuinermillu qulakkeerinninnermut eqquinerloratarsinnaammat.

Hans Peter Poulsen naapertorlugu qaammataasiaq atorlugu kiffartuussinerit akeqanngitsumik atulerpata Tusass A/S isertitatigut annaasaqassaaq, tamannalu Tusass A/S-ip Kalaallit Nunaanni nalunaarasuartaatitigut atortulersuutinik aserfallatsaaliuisinnaaneranut ineriartortitsisinnaaneranullu unammillernartitsilissalluni.

– Qaammataasiaq atorlugu attaveqaatinik sullissinermik allanik qinigassaqarnermi, nunanit allanit nalunaarasuartaatinik neqerooruteqartartut aningaasanik isaatitsissutigisinnaasaminnik, aningaasaqarnikkullu imminut akilersinnaatillugu nalunaarasuartaatitigut sullissinermik taamaallaat neqerooruteqartassasut naatsorsuutigisinnaavarput. Taamaalilluni Tusass A/S isertitatigut annaasaqassaaq, atortulersuutinullu aningaasartuutaat killilersuinerup atorunnaarsinneqarneranit annikinnerulernavianngillat, Hans Peter Poulsen oqarpoq.

Nunaqqativut pitsaanerusumik pineqartariaqarput

Pilersuinerup isumannaatsuunissaa isumannaallisaanermullu politikkimut tunngatillugu tunngavilersuutit Aqqalu C. Jerimiassenip paasisinnaavai, Tunumili Avannaanilu nunaqarfiit pilersuinerup isumannaatsuunissaanik immikkut ittumik qulakkeerinnittoqareersorinngilaa. Isorliunerusuni innuttaasut Starlink sooq atorsinnaannginneraat taamaattumik paasisinnaanngilaa.

– Innuttaasut internetimik akikinnerusumik siunnersuutip atuisinnaanngortissinnaavai, sumiiffinni internetimik amigaateqarfiusuni internetimik atuisinnaanngortitsilluni immaqalu allaat nunami atuisut akisunerpaat ilaannut Tusass sullissisariaarutsissinnaavaa, Aqqalu C. Jerimiassen allappoq.

Teknologiip ineriartornera inatsisinit siuarsimanerusoq, innuttaasullu pitsaanerpaamik internetimik atuisinnaanissaanik qulakkeerinnikkunnaarsimasoq, Aqqalu C. Jerimiassen isumaqarpoq.

– Teknikkikkut ineriartorneq sukkaqaaq, aammalu 1970-ikkunniilli atortakkavut pitsaanerpaajusutut isigiinnarsinnaanngilavut. Nunaqqativut isorliunerusuni najugallit pitsaanerusumik pineqartariaqarput.

Naalakkersuisoqarfik qaammataasiatigut attaveqaatinik neqerooruteqartartuni nutaani periarfissat, aarlerinartullu pillugit nassuiaasiuleruttorpoq. Nassuiaat Inatsisartut upernaakkut ataatsimiinnerini, ullumikkut tallimanngornermi aallartittumi, Inatsisartunut nassiunneqassasoq pilersaarutaavoq.

– Taamaattumik taamatut aalajangertigata eqqarsarluaqqaartariaqarpugut. Aalajangiineq kingunerlussappat, aalajangeereernerup kingorna allanngortinneqarsinnaassanngilaq, Tusassip akuersissutaasa avataatigut qaammataasiakkut attaveqaatit atulersinneqarnissaannut siunnersuut naggataarutaasumik Hans Peter Poulsenip oqaaseqarfigaa.