Umiarsuarnut takornariartaatinut ilaasut amerlassusaat Islandip illoqarfiata killilersorpai

Umiarsuarnik takornariartaatinik Islandimi takornariartitsisarneq Kalaallit Nunaannisulli siuariartorpoq, tamannalu unammillernartunik nassataqarpoq.

Umiarsuarnit takornariartaatinit Islandimi Ísafjörður ornigarneqarluartarpoq, takornarissalli qanoq amerlatigisut illoqarfimmiissinnaanerat killeqarpoq, taama kommunalbestyrelsi isumaqarpoq, maannalu iliuusissatut pilersaarusiorpoq.

Ísafjörðurimi takornariat amerliartuinnarnerisa malitsigisaanik malittarisassat nutaat atuutilersinneqarput. Umiarsuarnik takornariartaatit 200-ngajaat 200.000-inik ilaasullit, aasaq manna illoqarfimmut 2.700-t missaanni innuttaasulimmut tikinnissaat naatsorsuutaasoq, Islandimi tusagassiorfik RÚV nalunaarpoq.

Kommunip takornariat iluaqutigai, umiarsuarnut takornariartaatinut tulaffiusunut akitsuutit aqqutigalugit isertitaqarluarluni, ukiunili kingullerni umiarsuarnik takornariartaatinik takornariarpassuit illoqarfik inoqarterujussuartalersimavaat, RÚV allappoq.

Amerliartortariaqarput

Ukiut marluk ingerlareerpata, illoqarfiup atortulersuinerata ineriartornera ilutigalugu ullormut tikeraartartut amerliartortinnissaat pilersaarutaavoq.

- Atortulersuutitigut qaffasissuseq takornarialerisut pitsanngorsartuarunikku, bussinik amerlanerusunik pisisarlutik kiffartuussinertillu pitsanngorsartuarunikku […] perusuersartarfiit naammattut assigisaallu qulakkeerniarlugit, taava takornariat amerlanerusut inissaqartissinnaassavavut, Gylfi Olafsson, kommunalbestyrelsimi siulittaasoq, RÚV-imut oqarpoq.

Mingutsitsinerup annikillisinnissaa pingaarnerutinneqarumaartoq, eqqagassalerinermilu piujuartitsineq kommunip pingaarnerpaatikkumaaraa, iliuusissatut pilersaarummi erserpoq. Umiarsualiviup eqqaani pisuinnaat aqquserngiorneqarnissaat, atortulersaarutinillu inunnut ajornannginnerusunik pilersitsinissaq pilersaarutigineqarpoq.