Tusassip periusissiaani nutaami isorliunerusut ukkatarineqassapput
Tusassip isorliunerusunut attaveqaasersuinerunissaq pilersaarutigaa - assersuutigalugu satellitit atorlugit attaveqaasersuutit, radioqarfinnut tapertaasussat.
Annonse
Namminersorlutik Oqartussat attaveqaqatigiinnermut ingerlatsiviat Tusass ilisimatitsivoq piffissami periusissiami 2025-miit 2028-mut isorliunerusuni pilersuinerup isumannaatsuunissaa immikkut ukkatarineqassasoq.
Tusass 67-inik radiukkut attaveqaatinik aqqutilimmik, qaqqat qaani sinerissami inissisimasunik, sakkortusaaviuteqarpoq.
- Taakkua inuttaqanngilluinnarput, aammalu paasissutissat nalunaarsukkat illoqarfiit nunaqarfiillu akornanni siumut utimullu nassiussorneqartarneri eqqaassanngikkaanni avatangiisinut attaveqaratik. Taakkua taamaalillutik nukissiamik nammineq pilersuisoqarput, pingaartumik generatorinik, kisianni seqernup anorillu nukinganik annertunerusunik ukiuni kingullerni tapertaqartinneqartunik. Tamatuma saniatigut piffissat ilaanni generatorit unittoornissaannut, sakkortusaaviit ingerlatinnissaannut battereeqarput, Attaveqaasersuinermut Naalakkersuisoq Hans Peter Poulsen (S) Mariane Paviasenip (IA) paragraf 37 atorlugu apeqqutaanut akissuteqarluni nassuiaavoq.
Suliniut ukiuni arlalinni ingerlanneqartussaq
Mariane Paviasen aperivoq Tusass qanoq iliuuseqarumaartoq isorliunerusuni attaveqaatit ajoquteqartarmata attaveeruttarlutillu.
Akissummi nassuiarneqarpoq sarfaaruttoqartillugu attaveqaasersuutit ajornarnerulersinnaasartut, soorlu generatorit ajutoorsinnaasarlutik, naak generatorit sumiiffinni ikinnerpaamik marluusaraluartut.
- Generatorit sillimmateqarput, tassa imaappoq minnerpaamik generatorit marluupput, aammalu ukiumoortumik Tusass-imi maskinalerisunit misissorneqartarlutik. Tusass-ip nukissiuutinut attaveqaasersuutaannut annertuumik aserfallatsaaliuinissamut pisussanut pilersaaruteqaraluartoq, qamittoortarnerit pinngitsoorneqarsinnaanngilluinnangajapput. Tassunga ilanngullugu piffissat ilaanni qaqqat qaavinukarnissaq ajornakusoortorujussuusinnaasarpoq, tassami Tusass-ip qulimiguulimmik atugassaqarnissaq aammalu silap timmiffiusinnaanissaa, pinngitsoorsinnaanngimmagu, attaveqaasersuinermut suliffeqarfik nassuiaavoq.
Akissummi ilanngunneqarpoq Tusassip ilisimagaa, "nalunaarasuartaatitigut attaveqaqatigiinnermut periarfissaqarneq suli inuiaqatigiinnut kalaallinut pingaaruteqarluinnartunut ilaasoq ", aammali erseqqissarneqarpoq isorliunerusuni attaveqaasersuutit qajannaannerulernissaannut suliniut ukiuni arlalinni ingerlasussaassasoq.
