Tusassip imaatigut kabelip kipineqarnerani taarseeqqusinermut suliaq ajugaaffigaa
Tusassip umiarsuaatileqatigiiffimmut imaatigut kabelimik Sisimiuniit 30 kilometerit missiliorlugit kujasinnerusumiittumi kittoraasumut taarsiissuteqarnissamik suliakkiinera ukiut tallimat sinnerlugit ingerlareersorlu Nunatta Eqqartuussiviani ajugaaffigaa.
Annonse
Tusassip ukiumoortumik nalunaarusiaani allassimavoq taarsiissutissat 9,3 millionit koruuniusut, maannalu suliffeqarfiup naatsorsuutaani ilanngunneqarsinnaalersut.
Kikkut pisuunersut qularutigineqanngilaq, Isortaq Trawl ApS-illi ajoqusiinermut akileeqqusissut Nunatta Eqqartuussivianut suliareqqitassanngortippaa, 1,3 millionit koruuniinnaallu akilerlugit. Taakku isumaqaramik akiliut tamanna naammattoq.
Suliaq pisimatikkusunngikkaluaraat
- Soorunami suliaq pisimatikkusunngikkaluarparput. Inuiaqatigiinnut Tusassimullu aningaasartorfiusimaqaaq. Suliamili aalajangerneqarpoq imaatigut kabelip atortulersugaanitsinnut pingaarutilerujussuup mianerinissaanut tamatta akisussaasuugatta, aseruisorlu taarsiinissamut akisussaasuummat. Ingerlatsinermut pisortaq Jonas Hasselriis tusagassiuutinut nalunaarummi oqarpoq.
Immap naqqatigut kabeli kittorarmat internettip sukkassusaa Sisimiuniit Upernavik tikillugu sunnerneqarput.
Immatigut kabeli immap assigani nalunaarsorneqarnikuuvoq, taamaammat "tamakkerluta imaatigut kabelitta pigiinnarnissaanut illersornissaanullu akisussaaqataanissarput" kaammattuutiga.
- Imaatigut kabelip, Islandi USA-lu aqqutigalugit Nunarput nunarsuup sinneranut attavilerpaa. Kipineqarpat Nunatsinni attaviit tamakkerlutik kiperiataarsinnaapput. Mobilikkut-, internetikkut-, aamma akiliinissamut attaviit kipineqassapput, Nunatsinnilu suliffeqarfiit systemiminnut isersinnaajunnaassapput, Tusass tusagassiuutinut nalunaarummi allappoq.
