Tusartaatip nutaap kalaallit meerartai atugarissaartinnerulersinnaavai
Kalaallit meerartaasa siutimikkut aseruuttoortarnerat peqqutaalluni tusaaniarnerat ajornartorsiutaavoq. Misissuinerup nutaap takutippaa tusartaatip allatup ittup meeqqat tusaarniarnerminnut ajornartorsiutaat aaqqiissinnaagaat, taama SDU nittartakkamini allaaserisaqarpoq.
Meeraq siutiminik anniaraangat, nakorsamiit misissorneqaraangami paasineqakkajuppoq siulluttuusoq.
Nunatsinni siulluutillit amerlapput, taamaattumillu tusaaniarnerat annikissinnaasoq misissuinerup takutippaa. Meeqqat atuarfiani atuartut ilaat pingajorarterutaat tusaasakissinnaasartut, Syddansk Universitet, SDU nittartakkamini allappoq.
Nammineertitaasut
SDU ilaatigut allappoq meeqqat tusaasakikkaangata ilaqutaariit misigisimasartut innimiiginnarneqarlutik, immikkut ilisimasallit suliaritinnissamullu periarfissat periarfissaanngimmata, soorlu tusartaatinut tunngatillugu.
Meeqqat eqimattat nunatsinni tusartaatip nutaap ukiup ataatsip iluani misilerarneqarnerani misiligutitut atorneqarput - misilittagaallu ilisimatusaataalluarsinnaasut nalunaarusiami "Livet med høreapparat: Perspektiver fra børn, familier og skolepersonale”-imi atuarneqarsinnaavoq.
Ilaqutariit qulingiluat atuarfimmilu sulisut apersorneqarsimasut, Center for Folkesundhed i Grønland på Statens Institut for Folkesundhedip nalunaarusiaani allassimavoq.
- Tusaasakinneq Kalaallit Nunaanni ajornartorsiutaangaatsiarnera pissutaavoq, tassani pingaaruteqarpoq piffissap ingerlanerani suliarinninnissamut periarfissat nutaat misilittartuarnissaat, ingammik meeqqat ilaqutariillu misigisartagaat tusarnaarnissaat, Charlotte Brandstrup Ottendahl, ilisimatusarnermi suleqataasoq oqaluttuarpoq.
Meeqqat meeqqanik allanik pinnguaqateqarnerusut
Tusartaatip nutaaliaasup allaanerussutigaa Kalaallit Nunaanni sumiiffinni peqqinnissaqarfinni sulisuniit tunniuteriaannaammat app-ilu atorlugu nakorsaniit immikkut ilisimasalinniit Danmarkimi Rigshospitalimi aaqqissorneqariaannaalluni. Taamaattumik nakorsat immikkut ilisimasallit Kalaallit Nunaannukarnissaat meeqqaniit ilaqutariinniillu utaqqineqartariaqarani.
Tusartaat elastikkitaqarpoq meeqqallu niaquanut ikkunneqarsinnaalluni.
- Ilaqutariit amerlanerit tusartaatip atornerani ajunngitsumik misigisaqarput. Meeqqat atuarfimmi malinnaalluarsinnaalerput, meeqqallu allat pinnguaqatigisinnaalerpaat aamma ilaqutariit attaveqatigiilluarlutik oqaloqatigiilluarsinnaalerput. Atugarissaarnerat pitsaanerulerpoq, Charlotte Brandstrup Ottendahl nassuiaavoq.
Atuarfiuttaaq misigaa meeqqat oqallorinnerulertut allattariarsornikkullu piginnaaneqarnerulerlutik.
Issittumut naleqqussarneqassasut
Misissuinerulli takutippaa meeqqat tusartaat atuarfimmi annerusumik atortaraat, qasulertaramillu ulloq naallugu atorsinnaasanngikkaat.
- Silami aamma atornissaanut akunnattoortarput, atornerani nasaqarsinnaannginnamik, taanna unammillernarpoq. Kalaallimmi meerartai silamiikkaangamik ukioq kaajallangajallugu nasaqartaramik, Charlotte Brandstrup Ottendahl oqarpoq.
Tusartaatip aamma atornissaa inissinnissaalu iluaassinnaasut misigisarpaat. Ilaqutariillu ilaasa misigaat app-ip atornissaanut ajornartorsiuteqartut peqqinnissaqarfimmullu attaveqarniarneq aamma ajornakusoorluni.
-Misissuinerup takutippaa meeqqat tusartaatip atornera iluaqutigigaat, kisianni issittumut tulluarsarneqartariaqarpoq, Charlotte Brandstrup Ottendahl oqarpoq.
