Taxanik ingerlatitsisut inatsisaatsutut ingerlasoqalernissaa aarleqqutigigaat
Ilulissani taxartartut kommunip taxanik angallannermik malittarisassaqarunnaarnerata kingunerisaanik inatsisaatsutut pisoqalernissaa ernummatigaat: - Taxartartunut tunngasut aalajangersarnissaat inatsisitigut tunngavissaqarunnaarsimavoq, kommunip pisortaa oqarpoq.
Annonse
- Ukiut 25-t missaanni taxartartutut sulivunga, siornatigullu taamatut pisoqarsimanngilaq. Aalajangersimasunik malittarisassaqartuaannarnikuuvugut, Ilulissani taxartartoq Knud Fleischer Sermitsiamut oqarpoq.
Knud Fleischerip taxatartunut atugassarititat kommunimit aqunneqarunnaarsimanerat ernummatigeqaa.
Biilit qassiunissaat kilometerimullu qanoq akeqarnissaat kommunip siornatigut aalajangertarpaa.
Inatsisinik tunngavissaaruttut
Taamaattoqarunnaarporli. Nunatsinni kommunit taxanut nalunaarutinik taaneqartartunik nalunaaruteqarsinnaatitaanerat inatsisitigut tunngavissaqarunnaarsimasoq Avannaata Kommuniani isumaqarput.
Kommunemi pisortaq Nick Nielsen taamatut paasissutissiivoq.
Taxanik ingerlatsineq inuussutissarsiutit allat assigalugit maannakkut malittarisassalersugaasoq, inatsisitigut nutaamik pisussaaffilerneqanngippat kommuni akuliukkumanngitsoq oqarpoq.
Eqqartuussissuserisoq tapersiivoq - inatsisit nutaanngilisimapput
Avannaata Kommunia eqqartuussissuserisumit allaat misissuitinneqarsimavoq. Allakkiamilu Sermitsiap atuarsimasaani kommunit taxanik ingerlatsinermik malittarisassaliornissaannut inatsisitigut tunngavissaqarunnaarsimasoq eqqartuussissuserisumit inerniliunneqarpoq.
Eqqartuussissuserisut suliaq pillugu Danmarkimi angallannermut ministeriaqarfik politimestereqarfimmillu ilaatigut attaveqarsimapput.
Angallannermut inatsit qallunaat oqartussaaffigaat, inatsillu taanna naatsumik oqaatigalugu pisoqaavallaalersimavoq, tamatumalu saniatigut Kalaallit Nunaanni tamatumunnga tunngasumik nutaamik inatsisiliortoqarani.
- Inatsisaatsut silarsuaat
Knud Fleischerip Ilulissanilu taxartartut ilaasa kommunip nalunaarutaa naammaginngilaat.
- Inatsisaatsut silasuaraat.
- Allat assigalugit malittarisassaqarlutalu aalajangersimasumik suliffeqarusuppugut, Knud Fleischer oqarpoq.
Taanna Ilulissani taxartartut peqatigiiffianni siulersuisuni ilaasortaavoq, peqatigiiffiullu politikkerit inatsisinik nutaanik atuutilersitsisunik iliuuseqartinniarlugit maann sunniiniarsarivoq:
- Inatsit Kalaallit Nunaanni atuuttussaq piaartumik suliarisariaqarparput. Inatsisiseqanngimmat Politiit maanna iliuuseqarsinnaanngillat, Knud Fleischer oqarpoq.
