Sulisut ajoqusernerannut sillimmasiinermut inatsit nutaaq kukkuluttortoqarneranit kinguartinneqarpoq
Sulinermik ajoqusernermut sillimmasiinermut inatsisip allanngortinnissaa kinguaattoormat Inatsisartut siusinnerpaamik ukiakkut ataatsimiinneranni suliarineqarsinnaassaaq.
- Kinguartitsinermut pissutaavoq inatsisissatut siunnersuutip kukkusumik suliarineqarnera, tamannalu ajuusaarnarpoq. Kalaallisut tusarniaanermut nittartakkamut taamaallaat ilineqarpoq tusarniaasussanullu toqqaannartumik nassiunneqarsimanani. Namminersorlutik Oqartussat tamatuma kingorna qinnuteqarput tusarniaanissamut piffissaq sivitsorneqassasoq, siunnersuutillu 2024-mi Inatsisartut ukiakkut ataatsimiinneranni suliarineqarnissaanut kinguartinneqarpoq, suliffeqarnermut ministeri Ane Halsboe-Jørgensen Folketingip Kalaallit Nunaat pillugu ataatsimiititaliamut allakkatigut paasissutissiivoq.
Suliffeqarnermut ministerip Namminersorlutik Oqartussat kissaataat akueraa, tamatumalu kingunerisaanik inatsisissatut siunnersuut nalinginnaasumik piffissaligaasumik tusarniaassutigineqartussanngorpoq. Inatsisissatut siunnersuut ukiaanerani ataatsimiinnermi piareersarneqarlunilu oqaluuserineqassaaq tamatumalu kingorna Folketingimi 2025-mi upernaakkut suliarineqartussanngussalluni.
- Suliffeqarnermut nakkutilliisoqarfiup kukkuneq ajuusaarutigaa siunissamilu assingusunik pisoqarsinnaanera pinngitsoortinniarlugu pisoq ilinniarfigaa, suliffeqarnermut ministeri oqarpoq. Inatsisissatut siunnersuut qaammammi matumani kingusinnerusukkut tusarniaassutigineqassalluni taassuma naatsorsuutigaa.
