Sulisoqarnermi pisariaqartitat qasukkarneqartariaqalerput

Kommuneqarfik Sermersooq namminersorlutik oqartussanut qinnuteqarniarpoq inatsit immikkut ittoq kommunit namminersortut misiliutitut aaqqissuussaaneranni atuuttoq sakkukillisinniarlugu. Kommuneqarfik Sermersuumi kommunalbestyrelsi martsip aqqaneq-aappaani ataatsimiinnermini taama aalajangerpoq.

Ullumikkut kommunit meeqqeriviini sulisut minnerpaamik perorsaasumik ataatsimik, perorsaanermik ilinniagaqartumik ataatsimik ikiortimillu ataatsimik amerlassuseqartariaqarput. Sulisut amerlassusissaannut ilinniarnerminnut atatillugu sulinermik misiliisut aamma meeqqamut tapersersortit ilaatinneqanngillat.

- Sulisuni ataaseq pinngitsoorani perorsaasutut ilinniarsimasuunissaat piumasaqaataajunnaarsinnaagaluarpat, ilinniartitsisoq ataaseq ”perorsaasutut” atorfinitsissinnaagaluarparput. Tamanna meeqqat angajulliit atuarfimmut piareersarnissaannut iluaqutaasinnaavoq. Meeqqat angajulliit ukiumi kingullermi meeqqerivimmiittut inimi perorsaasunik ilinniartitsisunillu sulisoqartumi sammineqarpata, meeqqat ilinniarfimmut tunngatillugu piareersarneqarsinnaagaluarput, qanoq atuartinneqartarneq ungasippasikkunnaarsarlugu, tunngavilersuutigineqarpoq.

Meeqqat atuarfiannut inatsit aamma ilanngunneqarpoq

Aammattaaq nalunaarusiami allassimavoq namminersorlutik oqartussat meeqqat atuarfiannut inatsit ilannguttariaqaraat, inatsimmi nutaami kommunet namminersortut pillugit allannguisoqarsinnaappat.

- Inatsisit taakkua iluanni piffissaq ungasinnerusoq eqqarsaatigalugu eqaannerusumik sulisarsinnaavugut, assersuutigalugu atuartut nalinginnaasumik (inatsisinullu naapertuuttumik) ilinniartinneqarnermit allaanerusumik ilinniartinneqartariaqartut pillugit, taamaalillutik – ataatsimut isigalugu – piginnaasaqalersinnaapput suliffinni atorsinnaasaannik, atuarfimmit qimagutiinnarunik. Assersuutigalugu ikiueqqaarnermut, eqqiluisaarnermi allatigulluunniit, soorlu kantinani, meeqqeriveqarfinni piginnaasat pisariaqartinneqartuni, nassuiaatigineqarpoq erseqqissarneqarlunili meeqqat atuarfiannut tunngatillugu allannguutaasinnaasut siulliunneqalinngitsut.

Kommuneqarfik Sermersuup sulisut amerlassusaat pillugit maleruagassat qasukkarneqarnissaat siunnersuutigissavaa. Siunnersuutit katillugit sisamaapput.

Siunnersuutit allat ukuupput:

• IT-kkut atortorissaarutit atorlugit sulianik ingerlatsineq
• Suliffissarsiornermi atortorissaarutit amerlanerusut
• Tunumi Heimablídni