Suliniutinut aalajangersimasunut 35 millionit koruunit agguataarneqartut

Siorna peqqissutsimut tunngatillugu isumaqatigiissuteqarnerup malitsigisaanik maanna peqqinnissaqarfimmut 35 millionit koruuninik ukioq manna atugassanik immikkoortitsisoqarpoq.

Aningaasanut inatsimmi suliniutinut pingaarnerpaanut aningaasaliinissamut aningaasanik immikkoortitsisoqarsimavoq, ilaatigut kræftimik katsorsartinnermi erninermilu sullissinermi pitsanngorsaanissamut, naalakkersuisoq Agathe Fontain ilisimatitsivoq:

- Peqqinnissaqarfimmi pitsannguutissat aalajangersimasut arlallit maanna saqqummiussinnaagakkit nuannaarutigaara. Kræftertunik katsorsaasarnerup ineriartortinneqarnissaa pitsaanerulersinneqarnissaalu, nuna tamakkerlugu ernisunik sullissinerup nukittunerulersinneqarnissaa aammalu najukkani napparsimmavinni sullinneqarsinnaanerup pitsaanerulersinneqarnissaa qangaaniilli kissaataasimavoq, maannalu peqqinnissamut aningaasaliissutinik atuutsitsilernikkut tamanna iluatsippoq, Peqqissutsimut Naalakkersuisoq Agathe Fontain (IA), tusagassiuutinut nalunaarummi oqarpoq.

Katsorsaasarnermut annertusisamut aaqqissuussineq ataavartunngortinneqassaaq

Kræftimut tunngatillugu suliassanik ataatsimoortunik ineriartortitsinissamut, napparsimasut sukkasuumik nappaatip suuneranik katsorsaanerullu ilusissaanik qaffasissumik pitsaassusilimmik qulakkeeriffigineqarnerinik kinguneqartussanik, 2024-mi kræfti pillugu suliassaqarfimmut 4,7 millionit koruuninik aningaasaliisoqarpoq.

Danmarkimi kræftimik katsorsaasarnermut annertusisamut aaqqissuussinerup ataavartunngortinneqarnissaanut aamma aningaasaliissutaapput. Rigshospitalip napparsimasunut Danmarkimi najugaqartunut neqeroorutaasa assinginik napparsimasut kræftertut Kalaallit Nunaanneersut neqeroorfigineqartalernissaat taamaalilluni qulakkeerneqassaaq.

Tamatuma saniatigut 9 millionit koruunit erninermut sullissinermut immikkoortinneqarput, taakkulu Dronning Ingridip Napparsimmavissuani ernisarfiup allilerneqarnissaanut atorneqartussaapput, taamaalilluni Nuummi ernisut amerliartuinnartut naammaginartumik isumagineqarsinnaaniassammata.

Naartusunut ullormusiat

Ernisussiortut pingasunik aamma peqqissaasut pingasunik ilaneqarnerisigut, sinerissami peqqissaaveqarfiit immikkoortuini naartusunik isumaginninneq nukittorsaavigineqassaaq, naartusullu erniartorlutik aallartussat ullormusiassaannik peqqinnissaqarfimmi pilersitsisoqassaaq, napparsimasunullu akunnittarfimmiinnerminni namminneerlutik nerisassanik pisisinnaalissapput nerisassiorsinnaalissallutillu.

Napparsimmavinni peqqissaavinnilu peqqinnissakkut sullissinerup pitsanngorsarnissaanut 16,5 millionit koruunit atorneqassapput. Dronning Ingridip Peqqissaavianut attaveqarsinnaaneq sulisutigut isumalluutit amerlinerisigut ataavartussamik pitsannguiffigineqassaaq, peqqissaanermilu sulisunut attaveqarniarnermi akornutaasartut taamaalillutik taamatut amerlatigiunnaassallutik, Naalakkersuisut allapput.

"Peqqinnissaqarfimmi IT-mut kinguaattoorutit iluarseqqinnissaannut, peqqissuseq pillugu siunnersuisoqatigiinnik attuumassuteqanngitsunik pilersitsinissamut ingerlatsinissamullu, aammalu Peqqinnissaqarfimmi sanaartornermut pilersaarutip tamarmiusup suliarineqarnissaanut" 4,8 mio. koruunit atorneqassapput.

Suliniutit pillugit paasisaqarnerorusukkuit una tooruk.