INATSISARTUT ALLATTOQARFIAT
Sulinermi atugassarititaasut pillugit eqqartuussissuserisut misissuitinneqalerput
Inatsisartut Allattoqarfianni sulisut atugaat pillugit Sermitsiap nittartakkatigut nutaarsiassaqartitsivianit arlalinnik allaaserinnippugut. Siusinnerusukkut sulisimasut atorsimasatik pitsaanngitsut pillugit oqaluttuarput, tamannalu ilaatigut sulisut inatsisitigut pisinnaatitaaffiinik unioqqutitsisimasoqarneranut tunngasunik assersuutinik imaqarpoq. Maanna Inatsisartut siulittaasoqarfiata suliakkiutigisaanik eqqartuussissuserisut attuumassuteqanngitsut misissuisillugit aallartisinneqarput.
Qullersanit "minutsinik marlunnik oqaloqatigineqarnissamut" aggersarneqarneq nalunaaquttallu akunnerata missaanik sivisussusilimmik killisiorneqartutut inuttullu nikanarsagaalluni "oqaloqatigineqareerluni" oqaatsitigut mianersoqqussummik tunineqarsimalluni anillaqqinneq, massa arlaannaatigulluunniit sulisut sinniisaannik peqateqarnissamik periarfissinneqarsimanani.
Qullersanit pinngitsaalisaalluni "oqaloqatigineqarnissamik" aggersagaasimalluni tamatuma kingorna sianiutikkut qasutinneqarsimalluni annilaangatitaasimalluni qialluni "oqaloqatigineqarnermit" anillanneq qullersarisanit tarnikkut saassunneqarsimanerup nassatarisaanik, qullersat qinikkanit "isiginerlutsinniarneqarsimasutut" pasilliuteqarnerat pissutaalluni.
Atorfimminnit qaffasinnerusumit suleqatit tamarmik isiginnittuuffigisaannik siumoortumik ilisimatinneqarsimanani appasinnerusumut inissinneqarneq, sulisut sulinermi atukkatik pillugit naliliinerisa pitsaanngitsup qullersanullu sakkortuumik isornartorsiuinerisa (APV) kingunerisaanik.
Ullormi nal. 08:00 sioqqullugu minutsialunnik suliartorsimalluni nalunaarsimanermut aamma nal. 16:00 kingorna minutsialunnik qaangiilluni angerlarsimanermi nassuiaasitaaneq.
Isumaliutissiissutinik suliaqarnissap pitsaassusaa pineqarani piffissap sivikinnerpaap iluani isumaliutissiissutit naannerpaat suliarineqarnissaannik, massa Inatsisartut ataatsimiititaliaat suliamik ataatsimiititalianut suliassanngortinneqartunik suliluunniit aallartitsinngitsut siumoortumik piumaffigineqartarneq.
Assersuutit tamakku Sermitsiap nittartakkatigut nutaarsiassaqartitsivianit suli allaaserinngisaannut ilaapput, taakkuuppullu siornatigut sulisimasunit oqaluttuarineqartut, sulisuusimasunit taakkunannga arlallit soraarsitaasimapput ilaallu namminneq suliffimminnit tatisimaneqarnermik kingunerisaanik soraaginnartarsimapput.
Maanna misissuisoqarnera aallartinneqarpoq
Sulinermi atukkat qanoq innerinik oqaluttuarpassuit tusarfitsinnit arlalissuarneersut Inatsisartut siulittaasoqarfiata pimoorullugit paasisaqarfigerusulersimarpasippaat . Maannami Siulittaasoqarfik aalajangersimavoq Nuna Advokatit Inatsisartut allattoqarfianni pissutsit qanoq innersut pillugit attuumassuteqanngitsutut misissuitissallugit.
- Nuna Advokater Inatsisartut siulittaasoqarfianit qinnuigineqarpoq Inatsisartut allattoqarfiani sulinermi atugassarititaasut pillugit attuumassuteqanngitsutut misissuiffigineqassasoq. Misissuinermi suliakkiut tassaavoq:
Eqqartuussissuserisut misissuineranni Inatsisartut allattoqarfianni sulinermi atukkat qanoq ittuuneri qulaajaaffigineqassapput siunertarineqarluni sulinermi atugassarititaasut pillugit ajornartorsiuteqartoqarnersoq, tassungalu ilanngullugu aqutsisoqarnikkut ajornartorsiuteqartoqarnersoq.
Nuna Advokaterimi sulisoq eqqartuussissuserisoq Thor Suhr oqaluttuarpoq, maannakkut sulisut aammalu siornatigut sulisimasut misissuinermi peqataanissaminnut periarfissinneqassasut.
Nuna Advokaterinit ilanngullugu nalunaarutigineqarpoq, naatsorsuutigineqassasoq misissuineq sapaatip akunnerini marlunniit pingasunut sivisussuseqassasoq, tassani apeqqutaatillugit apersuinissanut pilersaarutip annertussusaa, qulaajaanermi peqataasinnaasut qanoq periarfissaqartigineri, taamatuttaaq apersuinerit ingerlanneqareerpata Inatsisartut Siulittaasoqarfiannut nalunaarusiorneq kiisalu qanoq iliuuseqartoqarnissaanik innersuussuteqarnermik imalimmik nalunaarusiortoqartussaanera.
