Sodavandit, eqqiluisaarnermut atortut qummoroortullu akitsuutikillisarneqalerput

Nioqqutissanik eqqussuinermi akitsuutit pillugit Inatsisartut inatsisaata allanngortinneqarnera pillugu Inatsisartut inatsisaannut siunnersuut maanna naalakkersuisunit oqaluuserisassanngortinneqarpoq, taannalu 15,5 million koruuninik naleqarpoq.

SODAVAND-it (mineralvand), allallu kulsyreqartut imigassat (akitsuutitut immikkoortoq 31 & 32). Nunatsinni sumiiffinni akitsuutit assigiinngitsuupput, Qaanaami, Ittoqqortoormiini Tasiilamilu nunaqarfittaanilu nunatta sinneranut sanilliullugu allaanerupput.

Ullumikkut Qaanaami, Ittoqqortoormiini Tasiilami nunaqarfittaannilu nioqqutissanut taakkununnga akitsuutit 5,75 kr.-iupput, nunatsinni inoqarfiit sinnerini akitsuutit 7,50 kr.-iusut. Tamanna naligiissarneqarniarpoq taamaalilluni innuttaasut tamarmik, sumi najugaqaraluarpataluunniit siunissami 5,75 kr.-nik nioqqutissanut taakkununnga akitsuutitigut akiliisalissapput.

QUMMOROORTUT, (akitsuutitut immikkoortoq 70). Ullumikkut qummoroortunut  100 procentimik akitsuuteqartitsisoqarpoq, akitsuut taanna tamakkiisumik peerneqassaaq.

TIPIGISSAATIT, PINNERSAATIT ANARTARFIMMILU ATORTUT (akitsuutitut immikkoortoq 90, uku minillugit: qaqorsaatit, kigutigissarnermut tunngasut, quliutit, unermut tipigissaatit, isikkat kininnerini taratsut, qajuusaasat & meeraaqqanut eqqiluisaarnermut atortut), ullumikkut nioqqutissat taakku akitsuutaat 38 procentiuvoq. Akitsuutit taakkununnga tunngasut tamakkiisumik peerniarneqarput.

Taamaattorli Inatsisartunit aalajangerneqassaaq Naalakkersuisut siunnersuutaat ullumikkut oqaluuserisassanut ilanngunneqartoq akuersissutigineqassanersoq, oqaluuserisassaq 23. april siullermeerneqassaaq Demokraatit sinnerlugit Inatsisartuni ilaasortap Nivi Olsenip siunnersuutaanut assingusumut peqatigitillugu siullermeerneqassaaq.

Aallarniutaannaavoq

Sermitsiap nittartakkatigut nutaarsiassaqartitsivianit aningaasaqarnermut akileraartarnermullu Naalakkersuisoq, Erik Jensen aperivarput, nioqqutissat peqqinnarnerusutut taaneqarsinnaasut aamma akitsuutikillisarneqarumaarnersut:

- Ilisimaneqartutut maanna aallarnisarparput akileraartarnermut aaqqissuusseqqinneq, isumaqatigiissutigisarpullu naapertorlugu siunnerfigaarput innuttaasunut atukkatigut oqilisaataasinnaasut ajornannginnerulersissallugit, akileraarutitigut iliuuseqarneruppat imaluunniit akitsuutitigut iliuuseqarneruppat suliniutissatut isumaqatigiissutigut naammassiniarlugit sulissaagut.

Akileraartarneq pillugu aaqqissuusseqqinnermut isumaqatigiissut uani nassaarisinnaavat.