Sermersooq millionilinnik suli pissarsiniarpoq
Pineqaatissinneqarsimasut marluk Danmarkimi inissinneqarsimanerannut tunngasut pillugit, kommunit marluk akiliisussanngortinneqarnerannut tunngatillugu Danmarkimi Eqqartuussiviit Qullersaanni Kommuneqarfik Sermersooq tunngaviusumik ajugaasuuvoq, suliarli suli naammassineqanngilaq.
Randers Kommunimit 329.000 koruuninik aamma Lolland Kommunimit 1,5 millionit koruuninik Kommuneqarfik Sermersooq akilerneqarpoq. Illoqarfiilli pingaarnersaata kommuniata 16,3 millionit koruunit suli tigunngilai, tamanna Atugarissaarnermut Suliffeqarnermullu Ataatsimiititaliap apriilip 18-ani ataatsimiinnissaanut saqqummiussami atuarneqarsinnaavoq.
Aningaasat taakku 10 millionit koruunit sinnerlugit amerlassusillit, Region Sjællandimut akiliutaasarsimasunut tunngassuteqartuusut paasinarsivoq.
"Kommuneqarfik Sermersuup Lolland Kommunemut Randers Kommunemullu akilertinniagaata annertunersaa Kofoedsmindenimiititsinermut Region Sjællandimit akilersinniarneqartumut tunngasuusoq, piviusorsiortumillu aningaasartalerneqarsimasoq" ingerlatsivimmi pisortaq Ejner Grønvold saqqummiussami ilisimatitsivoq.
Innuttaasup Kofoedsmindemiisinneqarneranut danskit kommunii peqatigiillutik aningaasartalersuisarnerinik, taamaattumik Randersip Lollandilluunniit akiliissussaatitaannginnerinik "piviusorsiortumik aningaasartalerneqarsimaneranik" oqarneq tunngaveqarpoq.
Allaffigeqatigiinnermik aallartitsisut
- Tamanna pillugu Region Sjællandimut akiligassaritinneqartumut Kommuneqarfik Sermersuup akileeqqusissutaanut Lolland Kommune aamma Randers Kommune pinngitsuutinneqarput, ingerlatsivimmi pisortaq ilisimatitsivoq.
Eqqartuussissummi aalajangiunneqartoq tunngavigalugu kommunip eqqartuussissuserisui Region Sjællandimut allaffigeqatigiinnermik ingerlatsisimasut Ejner Grønvold ilisimatitsivortaaq, tassani pineqarluni "Kommuneqarfik Sermersuup akilersimasai eqqartuussinerulli kingunerisaanik akiligassarisimanngisaraluisa utertinnissaanik piumasaqarluni".
- Tamatuma kingunerisaanik piffissaq imarisaalu eqqarsaatigalugit qanoq inerneqassanersut maanna suli erseqqissumik oqaatigiuminaappoq, ilisimatitsissutaavoq.
Suliaq ukiut pingasut sinnerlugit matuma siorna aallartippoq, eqqartuussiviullu qullersaata aalajangiinera tunngavigalugu akiitsullit marluk (Randers Kommuni aamma Lollandi Kommuni, aaqq.) katillugit 16,3 millionit koruunit missaanniittut nalikilliliissutigineqarnissaannik, ingerlatsivik aalajangerpoq.
- Region Sjællandimut akiligassat 2023-mut naatsorsuutit ataani ilanngunneqassapput, allaffissornikkut pisortaq ilisimatitsivoq.
Suliap tunuliaqutaa
Oktobarimi 2010-mi innuttaasut Nuummi eqqartuunneqarsimapput, Hedensted Kommunemilu inissiisarfimmut inissinneqarlutik. Tamatuma kingornagut Hedenstedimiitsillutik 2014-imi apriilimi Horsensip Eqqartuussiviani eqqartuunneqarput, tassani Nuuk Kredsretimi eqqartuussaanerat atorunnaarsinneqarluni.
- Innuttaasut inissinneqarsimanerinut Kommuneqarfik Sermersooq 2019-ip aallartilaarnera tikillugu akiliisarpoq. 2018/19-imi innuttaasut pineqaatissinneqarsimasut inissinneqarsimanerinut tunngasunik kommune sulianik misissuisimavoq, taamanikkut sulianut taamaattunut tunngasut pinerluttulerinermi inatsit naapertorlugu peqqissaavimmit akisussaaffigineqarput. Kalaallit Nunaanni pineqaatissiissutaasoq atorunnaarsinneqarsimasoq tassunga atatillugu paasineqarpoq, taamaattumillu danskit kommunii taakkuugunarput akiliisussaatitasut, suliamik saqqummiussinermi takuneqarsinnaavoq.
Danskit kommuniinit tamanna akuerineqarpasissimanngilaq, taamaattumillu suliaq Vestre Landsretimi aamma Højesteretimi 2024-mi januaarip 16-ianni eqqartuussineq ingerlanneqarsimalluni. Suliap tunngaviusumik annertussusaa pissutigalugu suliaq Vestre Landsretimi, illoqarfiup eqqartuussiviani pinnani, suliarineqarpoq.
