Saattuat: Norge avammut niuernermi iluaqutissaqalertoq
Norgemi aalisartut saattuarniat MSC-mik nalunaaqutsersorneqalernissartik iluatsippaat. USA-mut Asiamullu nioqqutissanik avammut tunisaqarnerulissutigineqassasoq Norgemi ilimagineqarpoq.
Annonse
Norskit saattuanik avammut niuernermi MSC-mik nalunaaqutsersorneqarnertik iluaqutigisussanngorpaat. Saattuanik piujuartitsinermik aallaaveqartumik pisassiisarneq nunani allani tuniniaanerminni iluaqutaasarmat.
- USA Asialu saattuanik avammut niuerfittut pingaarnerpaapput. Tassani aalisakkanik piujuartitsisumik tunisassianik piumasaqarneq annertusiartorpoq, naatsorsuutigaarpullu MSC-mik nalunaaqutsiisalerneq nioqqutissat niuerutiginissaannut ajornannginnerulersitsissasoq, Gislii Gislason, MSC-mi Atlantikup Avannaani immikkoortortaqarfimmi pisortaq, tusagassiuutinut nalunaarummi oqarpoq.
Kalaallit Nunaanni saattuanut tunisassianut MSC-mik nalunaaqutsiisoqarnikuunngilaq. Nalunaaqutsiineq piffissami qaninnerusumi kalaallit pisaannik avammut tunisaqartarnerannik sanngiillisitsinavianngitsoq Polar Seafoodi naliliivoq.
Tamanna Amerikami Asiamilu pisisartunik pissarsiniarnermi piffissami sivikitsumi sunniuteqarnavianngitsoq Polar Seafood Denmarkip pisortaanera Henrik Leth Sermitsiamut oqarpoq.
Siunissaq ungasinnerusoq eqqarsaatigalugu sunniuteqarsinnaasoq
- Siunissaq ungasinnerusoq eqqarsaatigalugu immaqa sunniuteqarsinnaavoq, MSC-li Europamiunerusoq maannakkut pingaartinneqarpoq, taakkunani niuertarfiit arlallit MSC-mik tunisassianik taamaallaat piserusuttarmata. Taamaattumik raajanut arnarluillu suaannut nalunaaqutsersuineq tamanut pingaaruteqarpoq, avataanili qaleralinniarnermut nalunaaqutserneqarnissaat maannakkut immaqa pingaaruteqarpallaanngitsoq. Imaanngitsorlu nalunaaqutserneqarnikuunerup attatiinnarnissaa ilungersuutiginngikkipput, Polar Seafoodip pisortaa oqarpoq.
Norskit qassutit kisiisa atorlugit aalisartarput, saattuallu ukiumut 10.000 tonsit missaanniittut nunaminni nunanullu tamalaanut tuniniarneqartarlutik.
Suliffeqarfiup arlaannaannulluunniit attuumassuteqanngitsup Global Trust Certifikation Ltd.-ip Norgemi aalisartut saattuarniartartut pisaat, pinngortitap ataqatigiinneranut sunniutai aqutsinerlu eqqarsaatigalugit, naliliiffigaat.
