Nutarterneqarpoq: Politikeri Inatsisartuni ilaasortaajunnaarsinneqarpoq
Inatsisartut sisamanngornermi ataatsimiinneranni oqaluuserisassaq siulleq tassaavoq Qinigaasinnaaneq pillugu Qinigaanerup Misilinneqarnissaanut Ataatsimiititaliamit inassuteqaat. Sermitsiap paasissutissaatai naapertorlugit Emanuel Nûko qinigaaffimmi matumani Inatsisartuni ilaasortaasinnaajunnaarpoq.
Annonse
Nutartigaq nal. 14.20.
Inatsisartuni ilaasortat ullumi oqaluuserisassaq pingaarnerpaaq – aalisarnermut inatsisissatut siunnersuutip siullermeerneqarnera – aallartitsinnagu, politikkerit matoqqasumik ataatsimiinnerminni Qinigaasinnaaneq pillugu Qinigaanerup Misilinneqarnissaanut Ataatsimiititaliamit inassuteqaat.
Tassa ataatsimiititaliap ilaasortaq qinikkatut sulisinnaanersoq oqaluuserineqassasoq innersuussutigisimavaa.
Sermitsiap paasissutissaataa naapertorlugit Emanuel Nûko (N) qinigaaffimmi matumani Inatsisartuni ilaasortaajunnaarpoq. Emanuel Nûko Nunatta Eqqartuussiviani eqqartuussaanikuuvoq, persuttaasimasutullu pinngitsuutinneqarsimalluni. Suliamili eqqissiviilliortitsisimasutut akiligassinneqarsimavoq.
Mette Hammeken ilaasortanngussaaq
Emanuel Nûkop paarlallugu Mette Hammeken Ittoqqortoormiineersoq Inatsisartuni ilaasortanngussaaq.
Ataatsimiinneq nalunaaqutaq aqqanermut aallartippoq, minutsillu 20-t missaanni matoqqasumik ataatsimiittoqareersoq nalunaaqutaq 11.20-p missaani ataatsimiinneq unitsinneqarpoq, ilaasortallu ataatsimiittarfik qimallugu partiip allaffianukaapput.
Sermitsiap paasissutissaatai naapertorlugit siulittaasoqarfik ataatsimiinnermik unitsitsiniarluni aalajangersimavoq, tassa matoqqasumi oqaluuserineqartoq pillugu siulittaasoqarfimmi ataatsimiissutiginiarlugu.
Akerliussutsimik takutitsisut anillaffigaat
Nalunaaqutaq 12.30 ataatsimiinneq suli nangeqqinngilaq, sunali ajornartorsiutaalluni ataatsimiinnerup nangeqqinneqarsinnaannginnera tamanut suli nalunaarutigineqarani.
Siulittaasoqarfiup ataatsimiinnissaa Inatsisartut peqqussutaannut atatillugu pisoq Inatsisartut siulittaasuata Mini Karlsenip Sermitsiamut ilisimatitsissutigaa, suulli sammineqarnersut itisiliiffiginagu.
Nalunaaqutaq 12.40 missaani nalunaarutigineqarpoq ataatsimiinneq nalunaaquttap-akunnerata affaanik sivitsorneqartoq.
Nalunaaqutaq ataatsimut akerliussutsimik takutitsisut Inatsisartunut apuupput. Inatsisartunut Naalakkersuisunullu ilaasortat akerliussutsimik takutitsisut anillaffigaat.
