Qinersikkut kræfteqalertartut katsorsartinnermik nutaamik neriuutissaqalertut
Danmarkimi napparsimavik Sygehus Lillebælt Danmarkimi siullersaallutik napparsimasunut katsorsaasalerput, tassani qinersikkut kræfteqalersatut kræftileqqinnginnissaannut katsorsarneqartarlutik. Inernerillu neriulluarnartorujussuusut, tusagassiuutitigut nalunaarummi allapput.
Annonse
Qinersikkut kræfteqaleqqinnginnissaq anguniarlugu Danmarkimi napparsimavik Sygehus Lillebælt nakorsaat atorlugu alloriarpoq. Napparsimavik naapertorlugu inernerit neriunaateqarput.
Napparsimavik napparsimasunut nakorsaat epcoritamab atorlugu qinersikkut kræfteqaleqqinnginnissaq anguniarlugu 2019-imi misileraavoq.
- Nakorsaat atorlugu napparsimasut 40 %-iisa nappaat tammariartortoq malugaat, allaat uuttortarneqarsinnaajunnaarluni. Taakkunani quliusuni arfinillit ukiut marluk iluanni nappaassuarmik utertuunngillat. Oqaluttuarisaanermi ajunngilluinnartoq, Michael R. Clausen Vejle Sygehusimi nakorsaanerusoq oqaluttuarpoq. Taanna misileraanermi Hæmatologisk Klinisk Forskningsenhedimi aqutsisuuvoq.
Napparsimasut allat kræftimik allamik nappaateqartut aamma neqeroorfigineqarput
Nakorsaat epcoritamab neriunaatilimmik inerneqarmat napparsimasut allat allanik qinersikkut aakkullu kræfteqartut aamma katsorsarneqarnissamik neqeroorfigineqarput.
- Nappaammut ataatsimut iluaqutaalluartoq paasinarsimmat qinersikkut assingusumik sakkortuumik kræfteqartunut annikitsukkuutaarlugu misileraatigineqalerpoq, aamma ajunngivissumik inerneqarpoq, Michael R. Clausen oqaluttuarpoq.
Ilisimatusarnermi inernerit nunarsuaq tamakkerlugu ataatsimeersuarnernut saqqummiunneqareerput, naatsorsuutigineqarporlu qaammatit tulliuttut qaangiuppata avammut nalunaarutigineqarumaartut, taama tvsyd.dk nittartakkamini allappoq.
