Puulukitunnnginneruneq
Kalaalimerngit akikinnerulersuuppata amerlanerit ammaloqisaat miserarlu taamaatissagaluarpaat. Qaquguli tamanna pissava? Apeqqut taanna maannakkut – Kalaallit Nunaanni nerisat nikerartuunissaannut pyramide pillugu siunnersuummut ilanngullugu –oqaluuserineqalerpoq.
Annonse
Sooq 3.500 kilometerinik umiartoreerluni Europamit neqinik eqqussineq nammineq tunisassianik pisinermiit taama akikinnerutigaa? Tamanna Inatsisartut upernaakkut ataatsimiinnerminni oqaluuserissavaat.
Oqallinneq misigissutsinik sakkortuunik kalluaasinnaavoq ullutsinni ajornartorsiutinik mamaatsunik itisiliimmat, tassalu inuuniarnermi aningaasartuutit innuttaasunut annertusiartorlutik.
IA-miit Mariane Paviasenip imminut pilersorsinnaaneq oqaluuserisassanngortippaa oqallinnermullu ilanngussaa tigussaasuuvoq: Imaattariaqarpoq innuttaasut tamatigut kalaaliminersinissaminnut akissaqartuaannartut, imminullu pilersorneruneq aamma namminiilivikkiartornermut iluaqutaassaaq, oqallisissiamini allappoq.
Ullumikkut taamaanngilaq:
- Ilisimaneqarpoq nioqqutissat Kalaallit Nunaanni tunisassiarineqarlutillu suliarineqartut niuertarfinnut anngukkaangamik akisuupilussuanngortartut. Assersuutigalugu savap neqaanut Neqi A/S kilomut 55 koruunit missaanni akiliisartoq niuertarfinni kiilumut 150 koruunit sinnerlugit akeqartarpoq. Saarullik aalisartunit pisiaralugu kiilumut 4-5 koruuneqartoq kiilumut 108 koruuninik akeqalersinnaasarpoq, Paviasen nassuiaavoq.
Neriuutigaa Naalakkersuisut aallaqqaammut nalunaarusioqquneqarnissaat amerlanerussuteqarfiussasoq taamaalilluni nassuiarneqarluni nioqqutissat qanoq atuisunut akiginnerulersinnaanersut.
Paviasenip erseqqissarpaa siunnersuuteqarnermigut tunisassiortunut atukkat pitsaanerulersinniaramigit.
- Siunnersuuteqarninni siunertaanngilaq inuussutissarsiuteqartut eqqornissaat, imalu kinguneqassanngilaq nioqqutissaatitik akikinnerusumik tunisassagaat, akerlianilli tunisassiornerat akilersinnaanerulerluni atuisunullu kajuminnarnerulerluni. Tamanna naalakkersuinikkut aaqqinniartariaqarparput, allappoq.
Nerisat nikerartuunissaannut pyramide
Upernaakkut ataatsimiinnermi aamma siunnersuut alla sammineqassaaq nunatsinnit nerisassanik soqutiginninnerulersitsisussaq. Naalakkersuinermik suliallit isumaliutigisariaqarpaat Nunat avannarliit killiit innersuussutaat tassalu Kalaallit Nunaat, Savalimmiut Islandilu ataatsimoorlutik nunani avannarlerni killerni nerisat nikerartuunissaannut pyramideliussasut.
Isuma taanna siorna Tórshavnimi ataatsimeersuarnermi pilersinneqarpoq peqataasut sumiiffinni nerisannaanik paasitinneqarmata. Siunnersuisoqatigiinni kalaallit aallartitaasa siulittaasuat Doris J. Jensen (S) Inatsisartut upernaakkut ataatsimiinnerani siunnersuuteqarpoq.
- Nerisassat nioqqutissat inuussutissartaallu pillugit paasissutissat pineqartillugit taava danskit nerisat nikerartuunissaannut pyramiditut taasartagaat nunani avannarlerni killerni atorneqartarsimavoq. Taassuma takutippaa nerisassat sorliit inuussutissaqassusii eqqarsaatigalugit pisariaqartinneqarnerpaasarnersut sorliillu pisariaqartinneqannginnerpaasarnersut. Taakkunani nerisassat nioqqutissiallu arlallit utaqqiisaasumik eqqunneqartussaapput. Akerlianik innuttaasut nunani avannarlerni killerni najugaqartut inuussutissaqarniarnikkut pisariaqartitaat najugarisap qanittuani nassaassaasut tamakkua pillugit ilisimasat ilisimatusarnerillu takutippaat, taamaattumillu nunat avannarliit killiit namminneq pisariaqartitatik nerisassaatitillu aallaavigalugit nerisat nikerartuunissaannut pyramidimik sanassagunik pissusissamisuussalluni.
