Politiit Nuummi nutaamik qitiusumik allaffeqarfittaarusupput
Kalaallit Nunaata Politiivisa Nuummi qitiusumik politeqarfeqalernissartik - ilaatigut Arktisk Kommandomik suleqatigiiffeqarfiusinnaasumik - suli iluatsikkumaartutut neriuutigaat.
Annonse
Politiit pisortaata Bjørn Tegner Bayip kissaatigaa Kalaallit Nunaanni Politiit suliassaat qullersaqarfimmi ataatsimi ataatsimoortinneqassasut. Politiit suliassaat Nuummi immikkoortortaqarfinni arlalinni agguarsimapput.
- Allanik suleqateqarsinnaanersugut suli aalajangerneqanngilaq. Tamanna ilaatigut aningaasanik pissarsinissaq politikkikkullu isumaqatigiinniarnerit – aamma soorunami suleqatitta pisariaqartitaannik nalilersuineq – apeqqutaatillugit, politimesteri Sermitsiap nittartagaanut oqarpoq.
Taanna nassuiaavoq allattoqarfik nutaaq “Kalaallit Nunaanni Politiinut pingaarnerpaajunngitsoq, kisianni soorunami upalungaarsimanermut innuttaasunillu sullissinermut tunngatillugu sumiiffimmut piumasaqaataasinnaasoq”.
Illoqarfimmi allani attartortittakkat
- Maannakkut kvadratmeterinik amerlanerusunik pisariaqartitsineq ilaannakuusumik matussusersinnaavarput Nuummi sumiiffinni assigiinngitsuni inissianik attartornitsigut. Tamanna naammaginanngilaq, Bjørn Tegner Bay.
- Oqartussaasut allat ataatsimut najugaqarfiginissaat ajornassappat soorunami oqartussaasut aningaasaliisartut oqaloqatigissavavut Nuummi politeeqarfimmik nutaamik pilersitsinissaq pillugu, tassani suliassavut illoqarfiit pingaarnersaanni ataatsimoortissinnaavavut, politimesteri oqarpoq, innersuussutigalugulu apeqqut taamaattoq nalilersorneqarumaartoq politeeqarfimmilu allani pisariaqartitsinermut naalagaaffiullu sinneranut, pisariaqartunik aningaasaliisussat peqatigalugit.
