Piumassuserinngisaminik meerartaarsinnaanngitsunut ikioorsiissuteqalernera assorujussuaq torrappoq

Peqqinnissaqarfiup piumassuserinngisaminik meerartaarsinnaanngitsunut IVF imaluunniit ICSI atorlugit passutsinnernik neqerooruteqarnissaminut periarfissareqqileraat tallimanngornermi apriilip ulluisa tallimaani nalunaarutigaat.

Nunatsinni meerartaarsinnaanngitsut ilagaat Ivalo Frank Larsen. Misiliinermi kingullermi naartulerpoq niviarsiaqqamullu anaananngorluni. Naalakkersuisut naartusinnaanngitsunut ikiorsiisarnertik 2019-imi unitsimmassuk Ivalo Frank Larsen akerliussutsimik takutitsisuni siuttuuvoq.

Taamaattumik Sermitsiap Ivalo Frank Larsen attavigaa:

LÆS OGSÅ

Ufrivilligt barnløse får nu tilbudt behandling af sundhedsvæsenet

- Piumassuserinngisaminnik naartusinnaanngitsut innersuunneqarsinnaalermata assorujussuaq nuannaarutigaara.

Naalakkersuisut 2024-mut siullermik 3 mio. kr.-nik Danmarkimut reagensglas atorlugu passutsikkiartornissamut immikkoortitsipput. Ikiorneqarnissamut pisariaqartitsineq annertunerussappat siunertamut 2024-mut 5,7 mio. kr.-nik atugassanngortitsisoqaqqissinnaavoq.

- Taanna assorujussuaq torrak, torragersuaarpara. Aamma allaqqagami 2025-imi finanslovimi ilaalersinnaassasoq, aamma taanna assorujussuaq torrappoq. Kiisami, kusanaq suliaq, Ivalo Frank Larsen oqarpoq.

Neriuuteqarnartoq

Naalakkersuisut siornatigut naartusinnaanngitsunut ikiorsiissuteqalissasoq nalunaarutigisareerlugu, aningaasanullu inatsisissami 2024-mut saqqummiunneqareerlutik peqqinnissamut isumaqatigiissummut aningaasat allamut atortussatut nuunneqarput. 

Ivalo Frank Larsen neriuppoq taamaattoqaqqissanngitsoq.

- Soorunami taamaaleriaannaavoq. Kisianni uani neriorsuerpalaarami 2025-imi finaslovimut ikkunneqarsinnaassasoq, Ivalo Frank Larsen naggataatigut oqarpoq.