Peqqinnissaqarfik:
Peqqinnissaqarfik pillugu naammagittaalliorsinnaaneq ajornannginnerulersinniarneqarpoq
Peqqinnissaqarfiup iluani napparsimasut naammagittaalliuuteqarsinnaanerat taarsiiffigineqarsinnaanerallu pillugit Inatsisartut Inatsisaattut siunnersuummik Naalakkersuisut saqqummiussipput, taamaaliornikkut naammagittaalliorsinnaaneq taarsiiffigitinnissamillu piumasaqarsinnaaneq ajornannginnerulersinniarneqarput.
- Maannamut allaffissornikkut naammagittaalliuuteqarnissamut taarsiivigineqarnissamullu periutsimik oqimaatsumik ingerlataqarpugut, aammalu amerlanertigut suliaq aallartinneraniit aalajangiisoqarnissaata tungaanut ukiut arlallit ingerlasinnaasarlutik. Tamanna innuttatsinnut naammaginanngilluinnartuuvoq, sulianimi taamaattuni suliap ersarissumik sukkasuumillu suliarineqartarnissaannik pisariaqartitsipput, Peqqinnissaqarfiup iluani napparsimasut naammagittaalliuuteqarsinnaanerat taarsiiffigineqarsinnaanerallu pillugit Inatsisartut Inatsisaattut siunnersuut pillugu Naalakkersuisut nassuiaapput.
1999-imiilli, "Kalaallit Nunaanni peqqinnissakkut inatsisit nutarternissaannut aqutsisoqatigiit" pilersitsisoqarnerata kingorna napparsimasut inatsisitigut pisinnaatitaaffii pillugit inatsisiliortoqarnikuuvoq. Taamaattorli peqqinnissaqarfimmit passunneqarnermut atatillugu ajoqusersimanernut napparsimasut taarsiivigineqarsinnaanerannut tunngatillugu inatsisitigut malittarisassaqarnissaq ilanngullugu eqqanaarneqarsimanani.
- Taamaalilluni peqqinnissaqarfimmit passunneqarnermut atatillugu ajoqusersimanernut napparsimasut taarsiivigineqarsinnaanerannut tunngatillugu inatsisitigut malittarisassaqarsimanngilaq. Peqqissutsimut Naalakkersuisoqarfik manna tikillugu taarsiinissaq pillugu sulianik aalajangersimasunik inatsisitigut tunngaveqanngitsumik suliarinnittarpoq, taamaallaalli peqqinnissamut tunngasutigut sullissisumik aalajangersimasumik isornartorsiuinissamut Napparsimasut Maalaarutaannik Aalajangiisartut tunngavissaqarsimagaangata sulianik suliarinnittarsimavoq. Suliassat allat eqqartuussivimmi suliarisassatut innersuunneqarput. Taamaammat aaqqissuunneqarnera nanginneqartartussanngoraangat taarsiivigineqarnissamut apeqqutip misilinneqarnissaa Napparsimasut Maalaarutaannik Aalajangiisartuni misilinneqarnissaa utaqqineqartariaqartarneranik kinguneqartarpoq, taakkulu sulianik kinguarsaasarlutik, Naalakkersuisut siunnersuummut nassuiaammi erseqqissaapput.
Napparsimasut siunissami sullinneqartik naammagittaalliutigisinnaalissavaat sullissisoq kinaagaluarpalluunniit
Inatsisissatut siunnersuummut Naalakkersuisut oqaaseqaatiminni aamma nassuiaateqarput, napparsimasut passunneqarnertik pillugu naammagittaalliuuteqarsinnaanerisa taarsiivigitinnissamillu piumasaqarsinnaanerisa ajornartorujussuuneranut pissutaasut pingaarnerit ilagigaat nunatsinni sumi tamani sulisut paarlakaattorujussuummata, minnerunngitsumik peqqinnissaqarfimmi:
- Kalaallit Nunaanni sulisut akornanni taarseraattoqartupilussuuvoq, tamannalu peqqinnissaqarfiup iluani aamma atuulluni. Katsorsaanerup ingerlaavartuusannginnera assigiissaartuunnginneralu napparsimasup peqqinnissamut tunngasutigut sullissisumik aalajangersimasumik naammagittaalliutigineqartussamik toqqaaniarneranut ajornakusoortitsisarpoq.
- Tamanna napparsimasoq sullissinermi pitsaassuseq nalinginnaasumik akuerisaq malillugu katsorsartissimanngikkaluarluni pisut ilaanni uparuaasoqarsinnaannginneranik kinguneqartarpoq. Taamaammat peqqinnissamut tunngasutigut sullissisut ataasiakkaat katsorsaanerminni kukkunerisinnaasaat pinnagit ingerlarnganili pingaarnerutitsisumik inatsiseqarnissaq pingaaruteqarpoq, taamaaliornikkummi peqqinnissamut tunngasutigut katsorsaanermik uparuaanissamut periarfissaqarnissaq taperserneqassammat. Tamanna peqqinnissaqarfiup naammaginanngitsumik katsorsaaneranut pissutaasut ilaannik, assersuutigalugu sulinerup aaqqissuunneranik, aaqqissuussaanikkut pissutsit aningaasaqarnikkulluunniit pissutsit tungiisigut kukkussutigisimasaminnik ilinniuteqarnissaannut periarfissiissaaq.
Aningaasaliissutinit 8,4 millioner koruuninit 7,4 millioner krouunit nunatta karsianut utertinneqarput
Napparsimasut peqqinnissaqarfimmi passunneqarnertik pillugu naammagittaalliortaraluartut sulissunniarnerisa ajornakusoorluinnarnera soorlusooq takussutissinneqartoq 2023-mut ilassutitut aningaasaliissutissatut siunnersuummi, taanna aamma tallimanngornermi apriilip tallimaani siullermeerneqarpoq.
2023-mi aningaasanut inatsimmi aningaasat 8,4 millioner koruunit napparsimasunut taarsiissutissatut aningaasaliisutaanikuugaluarput konto pingaarneq 34.01.02 aqqutigalugu. Kisianni aningaasaliissutinit taakkunannga 7,4 millionit koruunit decembarip naanerani 2023-mi nunatta karsianut utertinneqarput.
Inatsisissatut siunnersuut apriilip 25-ani aappassaaneerneqassaaq maajillu 2-ani 2024-mi pingajussaaneerneqassalluni.
