Pasinapiluttumik kalerriisunik illersuineq, assigiinngisitsinnginnissaq aatsitassanullu inatsit nutaaq

Inatsisartut upernaakkut ataatsimiinnerat tallimanngornermi nalunaaqutaq 11.00 aallartippat Inatsisartut suliassatik aallartissavaat.

Siorna ukiakkut ataatsimiinnermi oqaluuserisassat naammassineqanngitsut Inatsisartut suliassaannut ilaapput.

Naligiissitaaneq assigiinngisitsinnginnissarlu pillugit Inatsisartut inatsisaat oqaluuserisassani pingaarutilinnut ilaavoq. Taanna Naalakkersuisut ukiaq saqqummiussaraat Inatsisinillu Atuutsitsinermut Ataatsimiititaliap inaarutaasumik suliarinissaa kinguartikkusussimasaa.

Inatsisissatut siunnersuut ’pingaaruteqangaartutut’ isigalugu Naligiissitaanermut Naalakkersuisoq Naaja H. Nathanielsen (IA) Sermitsiamut siusinnerusukkut oqarpoq. Inuit innarluutillit, LGBT+-it, inuiaqatigiinnut upperisarsiornermullu tunngatillugu ikinnerussuteqartut, naartusut utoqqaallu naligiissitsinissamut aalajangiisartunut naammagittaalliorsinnaalissapput. Aalajangiisartullu nalilissavaat taakku eqqunngitsumik pineqarsimanersut.

Pasinapiluttunik kalerriisut illersorneqarluartariaqarput

Aammattaaq pasinapiluttunik kalerriisut, tassa whistlebloweritut aamma taaneqartartut, illersorneqarnerulernissaannik inatsisissatut siunnersuut naammassineqassaaq.

Whistleblowerinut tamanut toqqissisimanartumik ingerlasoqartassasoq siunnersuutigineqarpoq. Inatsisartut ukiaanerani 2022-mi ataatsimiinneranni Asii Chemnitz Narupip (IA) siunnersuutaata akuersissutigineqartoq aallaavigalugu whistleblowerit sulisitsisuminnit pillaatitut akiniarneqarnissaat aamma akiniarniarlugit sioorasaarneqarsinnaanerannut illersorneqarsinnaanngussallutik.

'Najukkani aatsitassanut' inatsit nutaaq

Siunnersuutit nutaarluinnaat ilagaat „najukkami aatsitassarsiorneq“ pillugu inatsit nutaaq.

Naalakkersuisut inatsisip atuutilernerani nunaqavissut aatsitassanik katersuinissaat piiaanissaallu ajornannginnerulersissavaat:

- Ataasiakkaanut tunngatillugu akuersissutinik piumasaqaatit arlallit peerneqarput. Sakkunik atuinissamut killilersuinerit peerneqarput, aammalu sumiiffinnut arlaqarnerusunut periarfissiisoqarluni kiisalu isertitassanut killiliineq atorunnaarsinneqarluni. Inatsisip atuutilernerani aalajangersimasumik najugaqartut, tamatumunnga akuersissummik peqaratik, aatsitassanik tamaginnik, aatsitassat qinngornernik ulorianartunik akullit 2 ilaatinnagit, katersisinnaalissapput piiaasinnaalissallutillu, Naalakkersuisut siunnersuummi paasissutissiipput.

Inatsisartunut inatsisissatut siunnersuutit saniatigut aamma oqallisissiatut siunnersuutit politikkikkut suliaqartut oqallisigissavaat.

Upernaakkut ataatsimiinneq ulluni suliffiusuni 20-ni ingerlanneqassapput, maajip 28-ata tungaanut.