Oqartussaaffiup angerlaanneqarnissaa qulakkeersinnaaviuk?
Partiit siuttui pingasunngormat oqallipput, ilaatigut inuussutissalerinermut oqartussaaffiup angerlaanneqarnissaa, namminiilivinnissaq aammali aalisarnermut inatsit oqallisigineqarlutik.
Pingasunngormat ullaap tungaani Inatsisartuni partiit siulittaasui upernaakkut ataatsimiinnermi Inatsisartut siulittaasuata Mimi Karlsenip (IA) ataatsimeeqatigai.
Partiit tallimat siuttui ataasiakkaarlutik oqaluttarfimmit apeqqutinut akissuteqarput. Namminiilivinnissaq - ilaatigut oqartussaaffinnik angerlaassinissaq - aalisarnermullu inatsit nutaaq oqallisigineqarluarput.
Inuit Ataqatigiit siulittaasuat Múte B. Egede oqaluttarfimmi siullersaalluni sassarpoq, illuatungiliuttullu siulittaasuata Pele Brobergip isornartorsiuineranut akissuteqartariaqarpoq.
Inuussutissalerinermut oqartussaaffiup angerlaannissaanut IA suli piareersimanersoq Brobergip paaserusuppaa, Naleqqammi naalakkersuisoqatigiinniinnerata nalaani tamanna pillugu isumaqatigiissuteqartoqarneranit ukiut arlallit qaangiutereermata.
Isumaqatigiissuteqarnissaq siunnersuutigigaa
- 2021-mi inuussutissanut tunngasut oqartussaaffigilernissaat atsioqatigiissutigaarput. Oqartussaaffiup angerlaanneqarnissaa qulakkeersinnaaviuk, Pele Broberg aperivoq.
Isumaqatigiissuteqartoqarneranit ukiut pingasut qaangiuttut suli oqartussaaffik tiguneqarsimanngitsoq Múte B. Egedep nassuerutigaa, politikkikkullu isumaqatigiissuteqartoqarnissaa aaqqiissutaasinnaasoq isumaqarpoq, qinersisoqarnissaa pissutigalugu sulineq unitsinneqannginniassammat:
- Naalagaaffiup oqartussaaffii qanoq piniarnerlutigit oqaloqatigiissutigisariaqarparput. Oqartussaaffiit angerlaannissaannut naleqqussarsinnaasariaqarpugut.
- Tamanna IA-p oqaloqatigiissutigerusuppaa. Suliaq unittooqqunagu qinersinerup kingorna atasinnaasumik politikkikkut isumaqatigiissuteqartariaqarpugut, Múte B. Egede oqarpoq.
Oqartussaaffinnik nunatsinni pissutsinut naleqqussakkanik Kalaallit Nunaat taamaallaat angerlaassisariaqaraluartoq Pele Broberg oqaluttarfimmiitilluni oqarpoq, Naalakkersuisullu suliamik tamatuminnga aallartitsinissamut piginnaatinneqassasut Naleqqap tapersersorpaa.
- Naleraq sumi inissisimava?
Brobergip oqaluttarfimmiinnerani Naleraq sumi inissisimanersoq Siumup siulittaasuata Erik Jensenip paaserusuppaa:
- Naleraq sumi inissisimava? Tungujortuua aappalaartuualunniit, Erik Jensen aperivoq, Hans Enoksenilu siulittaasutut kingoraarlugu Pele Brobergip siulittaasunngornerata kingorna Naleqqap anguniagai erseqqinngitsut taanna isumaqarpoq.
Enoksenip politikkia pissutigalugu Naleqqamiilersimalluni Pele Broberg akivoq:
- Hans Enoksenip ersarissumik anguniagaqarnera pillugu Naleraq sinnerlugu qinigassanngortissimallunga erseqqissassavara, tassa pissakinnerit illersorniarlugit, ilaatigut Broberg oqarpoq.
Tamatuma kingorna partiit siuttui taakku marluk inuiaqatigiinni „pisuut“ soqutigisaannik imminnut suliaqarneraapput.
Aalisarnermut inatsit suli oqallisigineqarpoq
Nunap oqartuussaaffiisa angerlaanneqarnissaat oqallisigiinnarnagu aammali politikkikkut anguniakkatik pillugit partiit unammilleqatigiipput, aammali piffissami matumani oqallisaaqisoq, tassa aalisarnermut inatsisissatut siunnersuut, oqallisigilerpaat.
Aalisarneq imminut akilersinnaasoq kisimi ingerlaannassanersoq ilaatigut Demokraatit siulittaasuat Jens-Frederik Nielsen, Múte B. Egedemit aperineqarpoq.
Aalisarnermut inatsit partiip niuernermik tunngaveqarnerulersinniaraa Demokraatit siulittaasuata oqaatigaa, tamanna suliffinnik amerlanerusunik pilersitsissasoq isumaqaramik.
- Aalisarneq akilersinnaasariaqarlunilu inuiaqatigiinnut isertitaqarnerpaasariaqarpoq. Isumaginninnermut politikki aalisarnermut politikki aqqutigalugu ingerlanneqartariaqarsorinngilarput, Jens-Frederik Nielsen oqarpoq, siunnersuutillu saqqummiunneqartup Royal Greenlandimut Namminersorlutik Oqartussanit pigineqartumut iluaqutaanissaa akerleralugu taassuma aamma erseqqissarpaa.
