Nutaarmiuni atuarfik ammaqqippoq - Ilinniartitsisoq ataaseq atuartorlu ataaseq
Nutaarmiuni atuarfiup ammaqqinnissaa Avannaata Kommuniani kommunalbestyrelsi tamarmiuulluni akuersissutigaa, atuartumut ataatsimut 3. klassimiittumut ilinniartitsisumik pissarsisimammata.
Atuartup ataatsip ilinniagaqarnissaa qulakkeerniarlugu Avannaata Kommuniani kommunalbestyrelsip Nutaarmiuni 30-inik innuttaassuseqartumi atuarfik ammaqqippaat.
Avannaata Kommuniani kommunalbestyrelsi marsip 25-ani ataatsimiimmata tamarmiullutik akuersissutigaat.
Ilinniartitsisoq ataaseq, atuartoq ataaseq
Atuarfimmut iseraanni nalinginnaavoq atuartorpassuit ilinniartitsisorpassuillu takusarlugit. Nutaarmiunili atuarfimmut iseraanni takusaq allaanerussaaq. Tassanimi ilinniartitsisoq ataaseq atuartorlu ataaseq taamaallaat takusassaammata.
- 19. januar 2024 Prinsesse Margrethep Atuarfiani pisortaasoq nalunaaruteqarpoq, Nutaarmiuni atuarfimmi sulisinnaasumik pissarsisimallutik. Ilisimatitsinermut ilannguppaa ullumikkut atuartoq ataaseq 3. klasseusoq atuartuusoq, kommunalbestyrelsip siunnersuutaani allassimavoq.
Qerruttoornissamut pinaveersaartitseqataassasoq
Nutaarmiuni ilinniartitsisoq atuartumut ataatsimut iluaqutaaginnarani atuarfimmut aamma iluaqutaassaaq:
- Inerisaanermut ingerlatsivimmiit nalilerneqarpoq, Nutaarmiuni atuarfik ulluinnarni inoqartaruni, pingaartumik issinnerani taava kiassaatit ruujorillu ullut tamaasa nakkutigineqarsinnaassasut. Taamaalilluni aamma atuarfimmi atuartitsinermi atortut atorluarneqarsinnaasut atuartitsinerup nalaani.
Inassutigineqartoq akuerineqarpoq, Upernavimmi atuarfiup pisortaa ilisimatinneqarpoq. Tassanngaanniillu suliaq ingerlaqqissalluni.