– Nujaqaleqqikkusuinnaraluarpunga

Upernaakkut seqinnarippoq. Linda Hegelund iteqqammerpoq, timaa qasoqqallunilu qasueqqavoq. Sisimiunut angalareerluni Nuummut angerlaqqammerpoq, tassani nujaarunnersanittarnerup, alopeciap, malugineqarnerunissaa ilisimasaqarfigineqarnerulernissaalu pillugit Arctic Circle Racemut peqataavoq. ACR nunarsuarmi sisoraatinik oqilaniunnerni sakkortunerpaatut taaneqartarpoq.

Linda Hegelundip qalluni kajortumik tarngummik tanippai. Ullaat tamaasa taamaaliortarpoq. Imminut tarrarsuutikkut qiviarpoq, ACR-imi naammassisani tulluusimaarutigalugit naammagisimaarluinnarlugillu. Alopecia pillugu ilisimasaqarnerulernissaq pingaartikkamiuk. Ullumikkulli inissisimaffimmiilernissaminut ilungersorsimavoq.

Linda Hegelund 19-inik ukioqarluni nujai katassuaalersimapput. Taamanikkut ilinniarnertuunngorniarpoq. Inuusuttuugami misigissutsikkut sanngiitsuunini inerisimalluannginninilu pillugit nujaarunnersaninnini kisissaanngitsunik najukkami nakorsamukaraangami tusartuartarpaa.

- Apeqqutit amerlaqaat. Sooq uanga? Nerisarisimasakka pisuuppat? Qanoq iliorsinnaavunga? Suut nerisariaqarpakka? Nerisassat vitaminillu misiliorarpakka, tamannalu piffissamik, nukinnik aningaasanillu atuiffiungaarpoq. Nutsakka utertikkusuinnaraluarpakka, Linda Hegelund 35-nik ukiulik oqarpoq.

Iluaqutaasoqanngilarli. Sivitsunngitsoq nujaasaqalerpoq.

- Nujaasaqartarlungalu qalluusaqartarpunga, piffissarujussuarlu atorlugu isikkorissartarlunga. Taamanikkut ilinniarnertuunngorninni festertuartarpugut. Piffissaq siulleq ikinngutimma tapersersorlungalu ikiortaqaannga, oqaluttuarpoq.

Linda Hegelund nujaqannginnini pillugu misigivoq ajunngitsumik iliuuseqartuartariaqarluni. ‘Nalinginnaasuuninimi’ ersersittariaqarpaa.

- Suunngitsutut misigivunga. Imminut tatigiunnaarlungalu naleqanngitsutut misigivunga, Linda Hegelund oqarpoq.

Italiamut angalaneq

Ullut qaammatillu ingerlalertupallapput. Linda Hegelundip nappaatini arriitsumik akueriartuaarpaa.

Ilinniarnertuunngoreerami au pairiuniarluni Italiamukarpoq. Ilaqutarsiaata nujaarunnikuuneranut katsorsarumavaat, akuersivorlu.

- Arriitsumik nutsakkiartorpunga. Kalaallit Nunaannut uterama nutsakka naatsuupput. Qaammatialuilli ingerlareersullu kataqqippakka. Nujaaruteqqinnera akueriniaqqittariaqalerpara. Sakkortoqaaraasit, oqarpoq.

Taamani Linda Hegelund katsorsarteqqinniarnani aalajangerpoq. Misigissutsikkummi akisuallaaqaaq.

Lindap anersaapiluit ilumiugisani kisiisa akiortariaqanngilai, aammali inuit qisuariarnerat isumaallu initoqaat.

- Aqqusinermi aperineqartarpunga: „Kræfteqarpit? Kemortippit?“ Inuit oqaasii kamaatigisarpakka. Nujaarunneq pillugu inuit ilisimasakippallaarnerat narrujuummissutigisarpara. Nujaarunnermut kræfti kisimi pisuuneq ajorpoq, Linda Hegelund oqarpoq qungasequtinilu peerlugu.

Katuamiippugut. Ullup qeqqasiorfissanngorpoq, inuppassuillu cafémi ullup qeqqasiorput. Sekundialuit ingerlanerinnaanni eqqarsaatit tusindilippassuit eqqarsaatigilerpai: Katuamiippunga, inuppassuaqarpoq, silalu qaamaqaaq. Qanoq eqqarsarpat?

Eqqarsaatit nuanniitsut takkutipallannermisulli qimaguteqqipallapput. Taamaaliorneq ilikkarsimavaa. Eqqarsaatit nuanniitsut peersiinnarlugit. Nalunaaquttap akunnerpassuini tarnip pissusaanik ilisimasalimmik oqaloqateqartarnermigut tamanna ilikkarpaa. Aatsaalli panissaarami akuerinnivippoq.

- 2014-imi panissaarpunga. Nujaqarunnaarninnit ukiut tallimat qaangiummata. Inuit allat qanoq eqqarsarnerat soqutigiunnaariasaarpara. Panigalu ajunngikkutta sinneri soqutaanngillat. Soqutaanngiivipput, Linda Hegelund oqarpoq.

Paasissutissat amigaataasut

Linda Hegelund naapertorlugu alopeciamik nappaateqartut ukiumut 2.500 koruuninik Namminersorlutik Oqartussanit tapiiffigineqartarput.

- Nujaasat pitsaasut oqorpallaarnatillu ungillerinanngitsut 13.000 koruunit missaannik akeqartarput, oqarpoq.

Alopeciartut ikiorserneqarnissaannut tapiiffigineqarnissaannullu paasissutissat erseqqinnerulertariaqartut, Linda Hegelund isumaqarpoq.

- Assersuutigalugu ilisarisimasama ilaat alopeciartoq qungasequterpassuarnik pissarsisimavoq. Nuannaarlunga aperaara sumi pisiarisimanerai. Sanami, akivoq. Nalulluinnarpara taamaaliortoqarsinnaasoq. Tapiissutinik soqarnersoq paasiumallugu inatsisinik misissuisaraluarpunga. Angusaqanngilangali, Linda Hegelund oqarpoq.

Sisimiuni ACR-imi peqataanissani piareersaramiuk issittumut naleqquttunik nujaqanngitsunut nasamik nassaarneq ajornartippaa.

- Nujaqanngitsunut timersortartunut atortorissaarutit assigiinngitsut amigaataapput. Piffiit ilaanni iliuusissaarutiivittarpunga, Linda Hegelund oqarpoq.

Ikinngutini aamma alopeciartoq peqatigalugu nujaaruttarnerup eqqumaffigineqarnerulernissaa pillugu unamminermut peqataavoq.

- Paquminartuussanngilaq. Alopecia pillugu inersimasut ilisimasaqarneruleraangamik tamanna meeqqanut nassuiarsinnaanerulertarpaat. Nammineq misilittakkakka tunngavigalugit nalunngilara tamanna pillugu ilisimasaqarnerulernissaq pisariaqartoq, oqarpoq.

Taamaattumik Linda Hegelund allallu marluk peqatigiiffimmik ”Alopecia Greenland”-imik pilersitsipput, kalaallit nujaaruttartut saaffigisinnaasaannik pilersitsinissaq siunertaralugu. Nappaatip kingunerisaanik aningaasatigut unammilligassanut peqatigiiffiup aallarterlaap tapiissuteqarsinnaanera aamma anguniarneqarpoq.

- Aamma atuarfinnukarlunga nappaat ammasumik oqaloqatigiissutigisarusuppara. Nuummiinnaanngitsoq, aammali illoqarfinni nunaqarfinnilu allani. Tamannami nanertuutaassanngilaq, uagutsinnummi nalinginnaasuuinnarpoq, Linda Hegelund oqarpoq.