Nanortalimmi Timersorluni højskolemik pilersitsinissaq sulissutigineqassasoq
Soqutigisaqaqatigiit Kalaallit Nunaanni siullerpaamik Nanortalimmi Timersornermut højskolemik pilersitsissasut Kommune Kujallermi kommunalbestyrelsi akuersissutigaa.
Nanortalimmi innuttaasut kissaatigaat illoqarfik siuariartussasoq ineriartorlunilu. Taamaattumik siuariartornissamik ineriartornissamullu iluaqutaasussamik Timersorluni højskoleqalernissaanik siunnersuuteqartoqarpoq; Nanortalimmi pinngortitaq kusanarluinnartoq atorluarlugu inerisarneqarsinnaammat.
Højskole imminut pigisutut ingerlasussaq
Oqaluuserisassatut siunnersuut Pipaluk Larsen-Rasmussenip kommunalbestyrelsimut qaqippaa, siornalu Inerisaanermut Ingerlatsivimmi ataatsimiititaliami suliarineqarluni.
Saqqummiunneqartumi naqissuserneqarpoq Nanortalimmi innuttaasut piginnaasaqartut kiisalu timersortartuusut soqutiginnillutik. Kujataanilu Nanortalik kisiartaasoq ilinniafeqanngitsoq. Kalaallit Nunaannilu timersornermik højskoleqanngitsoq aamma siunnersuummi allassimavoq.
Folkehøjskolit suliffeqarfittut imminut pigisutut nunatsinni ingerlasarput, qullersaaffigalugillu aqunneqarnerat siulersuisunit tallimaniit arfineq-marlunnik ilaasortaqartunik isumagineqarluni, taakku ilinniarfiup ingerlanneqarnera qullersaaffigalugu akisussaaffigaat, tamatumunngalu ilanngullugit suliamut aningaasaqarnermullu tunngasutigut ingerlassat aamma ilinniarfiup ingerlassai pillugit maleruarneqarnissaat
Suliniartoqarnissaa innersuussutigineqartoq
Inerisaanermut Ingerlatsiviup innersuussutigaa timersornermik højskoleqalernissamut nammineq pigisumik suliniartoqarnissaanik pilersitsisoqassasoq:
- Højskolit Naalakkersuisuniit akuerineqaqqaartussaapput, namminerlu pigisutut ingerlasussaallutik, tassani inuiaqatigiit soqutigisaat aallaavigalugit pilersaarusiorneqartussaalluni.
Pipaluk Larsen-Rasmussens siunnersuutaa kommunalbestyrelsip tamarmiusup siunnersuutip siunertaa tapersersorpaat, taamaattorli kommunip susassaqarfiata avataaniimmat itigartitsissutigalugu. Pilersinneqarpallu aningaasaqarnera kommunimit akisussaaffigineqartussaanngilaq.
