Namminersorlutik Oqartussat suliffeqarfiutaat nittartakkatigut saassunneqartoq

Asiaq marsip qeqqata nalaani saassussinermik ransomwaremik taaneqartartumik saassunneqarpoq. Namminersorlutik Oqartussat suliffeqarfiutaat tusagassiuutinut taama nalunaaruteqarpoq.

Peqquserluttut ransomware-mik saassussigaangamik suliffeqarfiit paasissutissaataannik atortuinillu iserfigisinnaajunnaarsitsisarput. Taakku aningaasanik akileeqqaartoqartinnagu paasissutissat iserfigineqarsinnaajunnaarsittarpaat. Pinerlunniat saassussinermi pissarsiaqarsimanngitsut pisortap oqaatigaa:

- Nittartakkatigut pinerlunnianit sakkortuumik saassunneqarpugut, qujanartumilli Asiami paasissutissaatigut sillimaniarneq eqqarsaatigalugu kopeerneqarsimammata, taamaalillutik pinerlunniat saassussigaluarnerat akiliinermik kinguneqanngitsoortinneqarpoq, Mette Skarregaard oqarpoq.

Saassussinerup kingorna Asiap nalinginnaasumik ingerlalernissaanut sapaatip-akunnialui ingerlaqqaartariaqartut ilanngullugu suliffeqarfiup paasissutissiissutigaa.  Inuppassuit angalassatillutik Asiap nittartakkatigut silassamik ilimasaarutaa atortarpaat, taanna aamma atorneqarsinnaanngikkallarpoq:

Pisoq pimoorunneqartoq

- Pisoq Asiamit pimooruttorujussuuarput, saassussinermillu kingunerluutit iliuuseqarfigalutigit, soorluttaaq aamma qarasaasiaqarnitsinni sillimaniarnermut attuumassusillit annertusarigut, Asiap pisortaa Mette Skarregaard oqarpoq.

Kalaallit Nunaata nittartakkatigut pinerluffigineqarsinnaanerata aarlerinassusaa annertuvoq

Kalaallit Nunaannut nittartakkatigut saassussisoqarsinnaanera aamma isertorluni alapernaarsuisoqarsinnaanera aarlerinaatilerujussuuvoq, Center for Cybersikkerhed naliliivoq.

Asiaq Namminersorlutik Oqartussat ataani suliffeqarfiuvoq. Center for Cybersikkerhedip Kalaallit Nunaanni oqartussat suliffeqarfiillu nittartakkatigut pinerluffigineqarnissamik ulorianartorsiortinneqartorujussuusut sapaatip-akunnerani tassani nutaarsiassiissutigereerallu saassussisoqarsimaneranik nutaarsiassaq paasissutissiissutigineqarpoq.

Kalaallit Nunaanni avatangiisit pillugit paasissutissanik katersineq Asiap pingaarnertut suliassaraa, assersuutigalugu qaammataasat dronellu atorlugit. Paasissutissat Namminersorlutik Oqartussanit, kommuninit, namminersortunit ilisimatusarnermullu atorneqartarput.

Suliffeqarfiup nittartakkatigut saassussineqarneranit atuisut sullitallu eqqugaanerat ajuusaarutigalugu Asiaq allappoq.