Nalunaaquttap nikisinneqarnissaanut atsiornernik suli katersisoqartoq
Nalunaaqquttap kingumut akunnermik ataatsimik uterteqqinneqarnissaa ukiorneranilu 2024-mi nalunaaqquttap nikisinneqareerneraniit nikiseqqinneqaqqinngisaannarnissaa anguniarlugu Qupanuk Olsen atsiornernik suli katersivoq.
Qupanuk Olsen atsiornernik suli katersivoq.
Nalunaaquttap kingumut akunnermik ataatsimik uterteqqinneqarnissaa ukiorneranilu 2024-imi nalunaaquttap nikisinneqarneraniit nikiseqqinneqaqqinngisaannarnissaa anguniarpaa. Atsiornernik katersineq pingasunngornermi apriilip ulluisa qulingani aallartippoq, sapaatip akunneranilu katersinissaq pilersaarutaalluni.
Katersinerli sivitsorneqarpoq, sulilu atsiorsimanngitsut suli periarfissaqarput.
- Suli amerlanerit angusinnaagigut upperigakku, Qupanuk Olsen Sermitsiamut oqarpoq.
Sapaatip akunnerani atsiornernik katersinermi Qupanuk Olsenip anguniakkani angunngilaa, tassami atsiornerit 10.000-it angunissaa siunertarigaluarpaa. Atsiornerilli 2.305-it pissarsiarisimallugit oqaatigaa.
Europamut naleqqussartuaannarnissaq pisariaqanngilaq
Qupanuk Olsenip atsiornernik katersineranut tapersersuillutik atsioqataasut ilaat isummersorput. Ilulissaneersoq isummersorluni allappoq:
- Kinguartariaqarmat, aalisartumik ueqarluni, taamatut nalunaaquttap nikinnera kaperlalernissaanut assut ernumanarpoq. Aamma qasunarpoq nalunaaquttap nikeqattaaginnavinnera meeqqanut uannullu. Pisariaqanngilaq naleqqussartuaannarnissaq Europamut.
Avannaani kisimi atsiortoqanngilaq. Savaateqarfimmiut aamma nalunaaquttap nikisinneqarnissaa kissaatigaat.
- Ukioq ullaakkut taartorujussuuvoq. Aatsaallu arfineq-sisamat qaangernerani qaammariartortarluni. savaateqarfimmiuugatta tulluanngitsorujussuussaaq taamaaginnassaguni. Savarniartarnerit taarsisalernerani kingusittorujussuanngussapput, ullorulereersoq aatsaat aallartassapput, unnoreersorlu aatsaat tikillutik. Tulluanngilaq. Maani illut imminnut avinngarusimapput, atuariartornerullu nalaani suli taartorujussuussalluni. Naleqqutinngilaq kulturitsinnut taamatut nalunaaquttap allanngornera.
Qupanuk Olsenip nalunaaquttap akunnernik marlunnik katillugu kinguartinneqarnissaa, tassa UTC -3-mut utertinneqarnissaa angorusuppaa.
Atsiornernik katersineq ataaisnngorpat apriilip 22-ata tungaanut pissaaq, kingornalu Inatsisartunut Naalakkersuisunullu tunniunneqassallutik.
Piffissamik aalajangersaanermut oqartussaaffik Kalaallit Nunaata tigunikuuaa. Tamatumunngalu atatillugu Inatsisartut aalajangernikuupput nalunaaquttap akunnermik ataatsimik allanngortinnissaa, Kalaallit Nunaat Europamut nalunaaquttap akunneranik ataatsimik ’qanilliniassammat’.
