Nalunaaquttap allanngortinneqarnissaanut Qupanuk Olsen atsiornernik katersivoq

- Ullup qeqqaraangat ullup qeqqassaarnikuuvugut.

Qupanuk Olsenip Facebookimi quppernermini nakunaaqutaq ualikkut pingasunngortoq seqineq qutsinnerpaaffissaminiittoq takutiutigalugu taama oqarpoq.

Qupanuk Olsenip Q's Greenlandimik piginnittuuvoq, tassani nunarput kulturerpullu nittarsaattarpai. Nunarsuarmi inuit millionit sisamararterutaasa Q's Greenland malinnaaffigaat.

Taassuma kissaatigaa nalunaaqquttap kingumut akunnermik ataatsimik uterteqqinneqarnissaa ukiorneranilu 2024-mi nalunaaqquttap nikisinneqareerneraniit nikiseqqinneqaqqinngisaannarnissaa.

Qasuvugut

Qupanuk Olsen ullumi pingasunngornermi apriilip qulingani ullaakkut atsiornernik katersilluni aallartippoq, nassuiarpaalu sooq:

- Meeqqagut unnukkut sininneq ajulersuaartarput. Tamaavitta ullaakkut artorsarsuaartarpugut massakkut. Amerlanerpaajusugut timikkut tarnikkullu eqqumiilliorpugut, nalunaaquttap taamak nikingatiginera peqqutaalluni, nangillunilu:

- Ukioq manna marsip 30-ani nalunaaqutarput akunnermik ataatsimik siuartipparput. Taavalu aamma siorna ukiukkut nalunaaquttap nikisinneqanngitsoornikuunera peqqutaalluni massakkut akunnernik marlunnik seqerngup qullasinnerpaasarfia unioqqalernikuuarput.  Assorujussuaq tupigivara qanoq qallunaat nalunaaqutaanut maniguunniaannarnerput, allaffissornikkunngooq aningaasatigut sipaarniarneq peqqutaalluni. Uagut inuttut peqqissuserput timikkut tarnikkullu akigalugu, Qupanuk Olsen oqarpoq.

Atsiornerit 10.000-it

Qupanuk Olsenip nalunaaquttap akunnernik marlunnik katillugu kinguartinneqarnissaa, tassa UTC -3-mut utertinneqarnissaa angorusuppaa.

Taassuma atsiornerit 10.000-init amerlanerusut ullut arfineq-marluk ingerlanerani angorusuppai.

Uuma allaaserisap allanneqarnerani atsiornerit 418-upput.

Atsiornernik katersineq sapaatip akunnerani ingerlareermat atsiornerit Naalakkersuisunut Inatsisartunullu tunniunneqassapput.