Naleraq immikkoortortaqarfinnik amerlanerusunik pilersitsisoq
Naleraq qinersinissamut piareersarluni nuna tamakkerlugu immikkoortortaqarfinnik pilersitsiortorpoq. Naleraq Nuuk aamma Sisimiut ileqquusumik ataatsimeersuaqqammerput.
Nuummi Naleqqap immikkoortortaqarfiani siulittaasutut qinigaaqqittup Juno Berthelsenip Sermitsiamut tamanna oqaatigaa.
-Immikkoortortaqarfitsinni Inatsisartunut kommunalbestyrelsimullu qinersinissamut piareersaatit aallartippavut. Qinersisinnaasut qinerseqataasanngitsut peqataatinniarlugit suliniuteqarpugut, innuttaasullu qinersinissamut peqataanissaata pingaaruteqassusaannik soqutiginnilersitsiniarluta paasititsiniaassalluta, Juno Berthelsen oqarpoq, tamannalu immikkoortortaqarfinni oqallitsitsisarnikkut anguneqassanerarlugu.
Naleqqap immikkoortortaqarfii annertusarneqartut nunatsinnilu sumiiffinni arlalinni ikioqatigiinnikkut immikkoortortaqarfiit amerliartortut paasissutissiissutigaa. Aasianni, Kuummiuni, Kulusummi Kullorsuarmilu immikkoortortaqarfiit ilaatigut pilersinneqarlutik.
- Soqutiginninnerujussuaq pissutigalugu innuttaasut qanimut oqaloqatigisarpavut, Naleqqap anguniagaasa pingaarnerit naammassinissaannut iluaqutaasinnaasunik immikkoortortaqarfinnik pilersitsinissamut qanoq ikiuutaasinnaanerluta, Naleqqami Nuummi siulittaasoq oqarpoq.
Ilaqutariit qitiutillugit
Nuummi Naleqqap immikkoortortaqarfiata ilaqutariinnut meerartalinnut utoqqarnullu pitsaanerusunik atugassaqartitsinissaq sulissutiginiarpaa. Pitsaanerusumillu attaveqaatinik pilersitsiniarluni suliniuteqassalluni.
Nuummi Naleqqap immikkoortortaqarfiani siulersuisut:
· Siulittaasoq: Juno Berthelsen
· Siulittaasup tullia: Dorthe Zeeb Kristiansen
· Siulersuisuni ilaasortaq: Paninnguaq Korneliussen
· Siulersuisuni ilaasortaq: Aksel Frederiksen
· Siulersuisuni ilaasortaq: Uiloq Svensson
· Siulersuisuni ilaasortaq: Anders Benjaminsen
· Siulersuisuni ilaasortaq: Frants Olsvig
· Sinniisoq: Jens Ostermann
· Sinniisoq: Sofie Dagmar Frederiksen
· Sinniisoq: Dorte Olsen Benjaminsen
Sisimiuni Naleraq aamma ataatsimeersuarpoq.
Sisimiuni Naleqqap immikkoortortaqarfiani siulersuisut:
· Siulittaasoq: Christina M Hardenberg
· Aningaaserisoq: Katsi Lennert
· Ilaasortaq: Peter Mathiassen
· Ilaasortaq: Steffen Johansen
· Ilaasortaq: Johan H Berthelsen
