SULISUT INISSIAANNUT TUNNGASOQ
Naalakkersuisut qisuariarput
Nakorsat marluk soraarput, peqqissaasullu Nuummi peqqinnissaqarfiup sulisuinut inissianik nutaanik kusanartunik attartornissamik akissaqanngillat. Pissutsit taamaattut Naalakkersuisut akuliunnerinik kinguneqarpoq.
Peqqinnissaqarfimmi sulisut sulisunut inissiarpassuit nutaat, Nuup qeqqani maanna attartortussaaruttut, qaammammut 10.700 koruunit 17.500 koruunillu akornanni akeqarnerat pakatsissutigaat.
Pisoq pillugu AG-p aamma Sermitsiaq.gl-ip allaaserisaqattaareeraallu Naalakkersuisut maanna qisuariarput. Naalakkersuisoqarfiit akimorlugit suliaq misissorneqassasoq Peqqissutsimut Naalakkersuisoq Agathe Fontain (IA) erseqqissaavoq.- Naalakkersuisutut suleqatikka ilagalugit tamanna oqaloqatigiissutigisimallugu oqaatigisinnaavara. Paasivarput peqqinnissaqarfimmi sulisut Nuummi ineqarnermut akigitinneqartut pillugit naatsorsuutigisaminnit piviusunngortitsivigineqarsimanngitsut. Isumaqatigiippugut suleqatigiissitaliortoqassasoq tamatuminnga misissuisussamik, Agathe Fontain AG-mut allappoq. Naalakkersuisut inatsisit sinaakkutaassut aallaavigalugit iliuuseqartussaapput.
AG-p Agathe Fontain arlalinnik apeqquteqarfigaa, ilaatigut peqqinnissaqarfimmi sulisut Nuummi Qatserisuni inissiarsuarnut nutaanut pingasunut nuunnissaat akikinnerulersinneqarsinnaanersoq.
- Naalakkersuisut suliaq pillugu oqaaseqaqqitsinnatik suleqatigiissitat innersuussutaat utaqqivaat, Agathe Fontain akivoq.
Suliaq nukinginnartoq
Qatserisup eqqaani inissianik pingasunik pisineq politikkikkut »suliatut nukinginnartutut« suliarineqarsimasoq AG paasitinneqarpoq. Tamanna aningaasaqarnermut ataatsimiititaliap 2023-mi aalajangiinerani atuarneqarsinnaavoq. Namminersorlutik Oqartussat inissiaatileqatigiiffiat, Illuut A/S, inissianik 70-inik Peqqissutsimut Pitsaaliuinermullu Aqutsisoqarfimmut attartugassanik piseqqullugu suliassinneqarpoq. Suliassaq tamanna politikkikkut sukkasuumik akuerineqartussanngortinneqarsimavoq, tamannalu Inatsisartut Aningaasaqarnermut Ataatsimiititaliaata ima allakkatigut qisuariarfigaa:
- Suliap tuaviortuunera ataatsimiititaliamit maluginiarneqarpoq suliallu tuaviortutut suliarineqarnissaanik Naalakkersuisut tunngavilersuutaat paasineqarlutik. Tamatumalu peqatigisaanik suliap taama annertussusillip tuaviortumik suliarineqarnissaata qinnutigineqarnera ataatsimiititaliamit paasiuminaatsinneqarpoq. Ataatsimiititaliamillu soorunami naatsorsuutigineqarpoq suliaq ataatsimiititaliamut nassiunneqannginnermini sukumiisumik isumaliutigineqarsimasoq, Aningaasaqarnermut Ataatsimiititaliami taamani siulittaasuusoq Hans Peter Poulsen (S) Naalakkersuisunut allappoq.
Naalakkersuisut suliaq pillugu »Dronning Ingridip Napparsimmavissuanut qanittumi inissiat nutaat kajungernartullu sulisussarsiornermut sulisunillu attassinissamut pingaaruteqarluinnartussaasut« ilisimatitsissutigisimagaat ataatsimiititaliaq aamma allappoq. Naliliineq tamanna ullumikkut apeqquserneqarsinnaavoq, nakorsammi marluk Nuummi najugaqarnissaminnut akissaqannginnertik pissutigalugu atorfimminnit maannamut soraarniuteqarmata. Tamatuma peqatigisaanik sulisut allat sulisunit allanit aamma nipituuliutigineqarlutik.
- Atorfinitsitsinissamut tunngaviusoq tamarmiuna kalluarneqartoq, taamaalillunilu Nuummi peqqinnissaqarfimmi sulisussarsiornermi ajornartorsiuteqalersitsilluni, Ernisussiortut Kattuffianni siulittaasoq Charlotte Bøgelund AG-mut oqarpoq. Isornartorsiuineq tamanna aamma Kalaallit Nunaanni Nakorsat Kattuffianni aamma peqqissaasut kattuffianni siulittaasumit saqqummiunneqarpoq. Kalaallit Nunaanni Nakorsaat Kattuffianni siulittaasoq Charlotte Mumm Ringip »Tamanna attanneqarsinnaannginnerarpaa«.
