Meeqqat oqaaseqartartuat: Napparsimasut taarsiiffigineqartarnerannut inatsit nutaaq pitsanngorsarneqartariaqarpoq
Peqqinnissaqarfimmi kukkusumik katsorsaasoqartillugu eqqugaasut siunnersorneqartarneri pitsaanerusariaqartut meeqqat oqaaseqartartuat Aviâja Egede Lynge isumaqarpoq.
Peqqinnissaqarfimmi assersuutigalugu napparsimasut kukkusumik sullinneqarsimasut, imaluunniit kukkusumik sullinneqarnermi meeqqamik annaasaqarsimanermik kinguneqartumik naammagittaalliuuteqarsinnaaneq taarsiiffigineqarsinnaanerlu pitsanngorsarniarlugit inatsisissatut siunnersuut Inatsisartut suliarileruttorpaat.
Meeqqat illersuisuat Aviâja Egede Lynge siunnersuutip siunertaanut ajunngitsumik isinnippoq, siunnersuutilli akuerinnginnerani arlalinnik pitsanngorsaasoqartariaqartoq Sermitsiap nittartagaani aviisimut oqarpoq.
- Naammagittaalliuutip suliarineqarnerata ingerlanerani inuit ikiorneqarnissartik pisariaqartippaat, oqarpoq.
Ilisimasaqarluartariaqartoq
- Maanna siunnersuisarfimmik pilersitsisoqassaaq, ajornartorsiulli tassaavoq napparsimasut naammagittaalliornermi taarsiivigineqarnissamilliinniit piumasaqarnermi suut pingaaruteqarnersut ilisimasaqarfigivallaarneq ajormassuk. Tassa aalajangiisoqaraangat nakorsamit nalunaarusiat oqaatsillu aalajangiisuusarput.
- Taamaattumik suliaq ilisimasarfigilluanngikkaanni napparsimasut ilaqutaasullu tamatigut ajorsartarput.
Meeqqanik peqqinnissaqarfimmi kukkusumik imaluunniit ilaannakoortumik passunneqarsimasunik assersuutinik arlalinnik imaqartumik Meeqqat illersuisuat 2023-mi allakkiamik suliaqarpoq.
Napparsimasunut ilaquttanullu toqukkut annaasaqarsimasunut siunnersuineq pitsanngorsarneqartariaqartoq, napparsimasummi toqukkulluunniit qimagaasimasut aliasuttut pisinnaatitaaffitik pillugit paasisaqarnissartik ajornakusoortillugulu aaqqissuussinerit qanoq atorsinnaanerlugit paasiuminaatsittaraat, Aviâja Egede Lynge oqarpoq.
- Aliasuttut peqatigineri allaalluinnarpoq, isumaqarpungalu naammagittaalliorfik taakkununnga sullissisoq amigaataasoq, oqarpoq.
- Nakorsaaneqarfik pissaaneqalissaaq
Meeqqat oqaaseqartartuata inatsisissatut siunnersuutip oqaaseqaataani allassimasut ilaat aamma isumakuluutigaa. Tassa Nunatsinni Nakorsaaneqarfiup naammagittaalliuutit tiguneqartut nalilersortassagai suliarlu Napparsimasut maalaaruteqartartut aqutsisoqarfiannut imaluunniit Peqqinnissaqarfimmi Atorfilittaasartunut saqqummiutissallugu.
Inatsisissatut siunnersuummut nassuiaammi "Nunatta Nakorsaaneqarfiata suliamik suliarinninneratigut,
taarsiinissamut Kalaallit Nunaanni suliat Kalaallit Nunaanni pissutsit aallaavigalugit
nalilersorneqarnissaat qulakkeerneqassaaq." allassimavoq.
Aviâja Egede Lyngep oqaaseq taanna isumakuluutigaa:
- Qanoruna isumaqarpiartoq? Nunatsinni nakorsat amerlavallaannginnerat eqqaamaqqullugu allanneqartarniartoruna? Nakorsaaneqarfik pissaanermik annertuallaamik tunineqarpoq, oqarpoq.
Aviâja Egede Lynge tallimanngorpat Inatsisartuni Ilaqutariinnermut Peqqissutsimullu Ataatsimiititaliami oqalugiassaaq, tassanilu isummani saqqummiutissavai.
