KNAPK nuna tamakkerlugu akerliussutsimik takutitseqqusisoq
KNAPK-p ikummatissap akitsoraluttuinnarnera akuersaarumajunnaarlugu nuna tamakkerlugu suna tamaat unitsillugu sisamanngorpat apriilip aqqarnani akerliussutsimik takutitsinissamut piareersarpoq.
Annonse
Aalisartut piniartullu kattuffiata KNAPK-p Naalakkersuisut aalisartunut tapiissuteqarnissamik suliniuteqaratik ikummatissap akitsoraluttuinnarnera naammaginngilaa.
Taamaattoqarnera pissutigalugu KNAPK-p nuna tamakkerlugu suna tamaat unitsillugu akerliussutsimik takutitsinissaq sisamanngornermi apriilip 11-ani nalunaaqutaq ataatsimut aallartissasoq kattuffik nalunaarpoq.
- KNAPK-miit ikummatissap akia qaffanneqarpat sinerissap qanittuata ikiorsiiffigineqarnissaanik qulakkeerinninnissaq ujartorneqarpoq. Tamannalu pivoq. Sinerissap qanittuani aalisarneq, ingammik saarullinniarneq eqqarsaatigalugu ikummatissap akiata qaffasinnerulerneratigut suli akilersinnaajunnaarpoq, naak taanna sioqqulluguli akilersinnaanngereersoq, KNAPK tusagassiuutinut nalunaarummi allappoq.
Liiterimut 60 oorimik akitsortoq
KNI-p pingasunngormat apriilip pingajuanni ikummatissat akii literimut 60 oorimik qaffappai. Akit qaffanneqarnerat nunarsuarmi uuliap akiinut naleqqussaaneruvoq. Nunatsinni ikummatissat akii ukiuni kingullerni allannguuteqarsimanngillat, naak nunarsuarmi akit qaffarujussuartaraluartut. Naak nunarsuup sinnerani akit ineriartornerat allaanerungaluartoq KNI-p akit pillugit isumaqatigiissuteqarnikuunera pissutigalugu nunatsinni akit sunnerneqarnerat killeqarsimavoq.
KNAPK-lli piumasaraa aalisartut imminut akilersinnaasumik inuussutissaqassappata ikiorserneqartariaqartut:
- Sinerissap qanittuani aalisarnerup ingerlaannarnissaa ajornarsiartorpasippoq, tassami inuussutissarsiummi kajumissaatit imminullu akilersinnaasumik ingerlanissaanut toqqammaviit tamarmik piiarneqarput. Saarullinniarneq imminut akilersinnaanngereerpoq. Maannakkut sinerissap qanittuani aalisartut tamarmik erloqisinneqartussanngorput, apeqqutaatinnagu sunik aalisarnersut, KNAPK-mi siulittaasoq Nikkulaat Jeremiassen oqarpoq.
