NANORTALLIP KOMMUNE KUJALLERMIIT AVISSAARNISSAMIK KISSAATEQARNERA
Kingunerisinnaasaanik misissuinissamut aningaasaliisoqassasoq
Nanortalik Kommune Kujallermiit avissaassaguni kommunimut illoqarfimmullu qanoq kinguneqassava? Apeqqutit akisinnaajumallugit nalunaarusiamik suliaqartoqarnissaanut Kommune Kujalleq aningaasanik 1 millionit koruuninik immikkoortitsissaaq.
Annonse
Nanortaliup nammineq kommuninngornissaanut atsiornernik katersisoqarmat innuttaasut 700-it sinnillit atsioqataapput. Kommunalbestyrelsi aalajangerpoq Nanortaliup immikkuulernissaanut suliniutit aallartissasut. Nalunaarusiami Nanortalimmut Kommune Kujallermullu qanoq isumaqassanersoq oqaluttuarineqassaaq.
Kommunip innuttaasut kissaataat tusaarniarpaa. Kisianni Nanortalimmi innuttaasut avissaanissamut krydsiliinnginneranni avissaarneq qanoq isumaqassanersoq innuttaasut paaseqqaartariaqarpaat.
Nalunaarusiaq millioninik akeqassasoq
Kommune Kujallermi kommunalbestyrelsip kingunerisinnaasamik misissuinissamut qinnuteqaat akueraat. Suliassarlu akuerineqariarpat suliarineqassaaq.
- Naalakkersuisut Inatsisartullu naggataatigut tassaapput kommunit aaqqissugaanerat pillugu inatsisinik akuersisartuusut. Aasaanerani sulinngiffiit tikitsinnagu isumasiuilluni taasititsineq pisinnaanngitsoq nalilerneqarpoq, siunnersuummi allassimavoq.
BDO tassaavoq nalunaarusiamik suliaqartussaq. Taakkua missingersorpaat nalunaarusiaq 300.000 koruunit 1 millionit koruunillu akornanni
akeqassasoq, taavalu paasissutissat suliamut attuumassutillit tamaasa tigoreerneriniit
suliarinera qaammatinik pingasunik sivisussuseqassangatillugu.
Nanortalimmi innuttaasut nunaqarfimmilu innuttaasut taamaallaat innuttaasutut taasitinneqassapput.
Nalunaarusiaq naammassippat innuttaasunut qanimut saqqummiunneqassaaq. Kommunip nittartagaani Facebookianilu aamma nittarsaanneqassaaq.
Taava qaqugu innuttaasut taasitinneqassappat? Aasaanerani sulinngiffiit tikitsinnagit isumasiuilluni taasititsineq pisinnaanngitsoq nalilerneqarpoq.
