Kalaallit Airports Mittarfeqarfiillu ataatsimut nutaamik ateqalerput
Kalaallit Nunaat nunarsuarlu qaninnerulersikkumallugit, Kalaallit Airports aamma Mittarfeqarfiit allanngorput. Logo periusissiarlu nutaaq. Suliffeqarfiup pisortaa naapertorlugu tamanna suliffeqarfiup ineriartortinnissaanut periarfissaqalersitsissaaq.
Annonse
Suliffeqarfiup aaqqissuussaanera sunniuteqarluarnerulersinniarlugu, pitsaanerulersinniarlugu kattutsinniarlugulu Kalaallit Airportsimi Mittarfeqarfinnilu sulisut pisortaalu ilungersorlutik ukiut kingulliit ingerlanerini suliniuteqarsimapput, taama tusagassiuutinut nalunaarummi ingerlatseqatigiiffiup pisortaa Jens Lauridsen, oqarpoq:
- Maannakkut ataatsimoortumik taaguuteqalerluni kinaassuseqalerlunilu, siunissami Kalaallit Nunaanni mittarfinnik qulimiguulinnullu mittarfinnik sanaartornermut, ineriartortitsinermut ingerlatsinermullu tamarmut siuttuulerluni, nukittuffitta ataatsimoortunngortinnissaat piffissanngorpoq: Tassalu Greenland Airports, ingerlatseqatigiiffimmi pisortaq Jens Lauridsen oqarpoq.
- Peqatigisaanik ataatsimoortumik takuneqarsinnaasumik isikkoqalernissaa ineriartortipparput, nutaamik logoqalerluta nutaamillu periusissiaqalerluta. Aaqqissuussaaneq ersarissumik anguniagaqarneq tunngavigalugu ineriartortissavarput, oqaatsit ukua atorlugit eqikkaasimalluta "Greenland Airports: Periarfissanik ammaavugut".
Kalaallit Nunaat nunarsuarlu tikikkuminarnerusut
Mittarfinnik ineriartortitsineq inuiaqatigiinni kalaallini siuariartortitsinermut ineriartortitsinermullu patajaatsumik tunngavissiissasoq, ingerlatseqatigiiffiup siunnerfigaa.
Mittarfiit pioreersut pilersinneqartussallu Kalaallit Nunaata nunarsuullu tikikkuminarnerulersinnissaannut tunngaviusussatut, Greenland Airportsip ingerlanneqarnerani ineriartortinneqarneranilu qitiusunut ilaatinneqartut ilagigaat, tusagassiuutinut nalunaarummi allassimavoq.
- Suli suliassaqarpugut, kisianni suliap ingerlanera aammalu naggataatigut angusassatta tungaanut aqqutaa, aaqqissuussaanerup iluani aammalu Nuummi, Ilulissani Qaqortumilu mittarfittaassanik sanaartornermi kiisalu atulersitsinissaq qilanaaraarput. Greenland Airportsimut ataatsimoortumut Kalaallit Nunaanni innuttaasut, suleqatigisartakkavut sullitavullu tikilluaqqusinnaagatsigit tulluusimaarutigaarput, pisortaq Jens Lauridsen naggasiilluni oqarpoq.
