Ingerlatseqatigiiffiit akiitsui ukiut tallimat ingerlaneranni marloriaatinngortut

Namminersorlutik Oqartussat ingerlatseqatigiiffiutaanni ernialinnik akiitsut 2018-imi 3,4 milliardit koruuniniit 2022-mi 6,6 milliardit koruuninut amerleriarsimapput, Namminersorlutik Oqartussat ingerlatseqatigiiffiutai pillugit ukiumoortumik nalunaarusiami, ingerlatseqatigiiffiit sinneqartooruteqanngitsut ilanngullugit, tamanna atuarneqarsinnaavoq.

Ingerlatseqatigiiffiit sisamat akiitsoqarnerpaat tassaapput Air Greenland A/S, Iluut A/S, Royal Arctic Line A/S aamma Royal Greenland A/S.

Namminersorlutik Oqartussat ingerlatseqatigiiffiutaannaasa akiitsui 2022-mi milliardinik amerlanerungaartunik naleqarput: 8,9 milliardit koruunit.

Navianaat

Aningaasaqarnermut Siunnersuisoqatigiit siornatigut erseqqissarsimavaat akiitsoqarpallaarneq navianaateqartoq.

- Ingerlatseqatigiiffinni taakkunani ataatsimi arlalinniluunniit aningaasaqarnikkut ineriartorneq ajorpat tamanna nunatta karsianut annertuumik kinguneqarsinnaavoq. Ingerlatseqatigiiffinni suliassat amerlanertigut inuiaqatigiinnut pingaaruteqarput. Tassa imaappoq, inuiaqatigiit aningaasaqarneranni pingaaruteqarluinnarput, aningaasatigullu ajornartorsiortoqartillugu matuneqarsinnaaneq ajorlutik. Taamaattoqartillugu nunatta karsia suliassanik ingerlatitseqqiinissamut ilungersunartorsiussaaq, ANingaasaqarnermut Siunnersuisoqatigiit 2022 ukiakkut nalunaarusiaanni allassimavoq.

Aningaasaqarnermut Siunnersuisoqatigiit tamatumunnga atatillugu tikkuarpaat akiitsoqarneq inissiat, pilersuinerit, umiarsualiviit mittarfiillu kiisalu heliportit aserfallatsaaliorneqarnissaat kinguaattoorfiungaarneranut attuumassuteqartoq.

Akiitsoqarneq suli annikillisinneqarsinnaarpasinngilaq, politikerimmi erngup nukinganik nukissiorfimmik milliardilikkaanik aningaasartuuteqartumik, ilaatigut taarsigassarsinikkut, alliliinissamik kissaateqarput.

Erngup nukinganik nukissiorfiliornerit akiitsunik amerlisitsissasut

Grønlandsbankenip 2023-mut ukiumoortumik naatsorsuutinut atatillugu akiitsut qanoq annertutiginerat aamma misissorsimavaa, ukiunilu aggersuni qaffakkiartornissaat naatsorsuutigalugu.

- Tamatumunnga pissutaanerpaavoq erngup nukinganik nukissiorfiliornissamut suliniutinut, 2025-mi aallartittussatut naatsorsuutigineqartunut, taarsigassarsisoqarnissaa. Taakkua ilanngunneqarpata, 2024-miit akiitsut qaffakkiartussapput 2026-milu 9,2 milliarder koruuniussallutik. Akiitsornerup annertusiartornera pissutigalugu Kalaallit Nunaata ukiualuit ingerlaneranni navianartorsiornini taamaasilluni annertusilluinnassavaa. Tamatuma saniatigut erseqqissarneqarpoq, pilersaarutit naapertorlugit akiitsornerusoqarnissaa aningaasaliissutinik pisariaqartitsineq piviusoq naapertorlugu pinngimmat, tassami pisortat inissiaataasa attaveqaatillu aserfallatsaaliorneqarnissaat kinguaattoorfiummat. Kinguariarneq tamanna anguniarlugu maannakkut attaveqaatinut aningaasaliissutit amerlaqataannik aningaasaleeqqinnissaq pisariaqartinneqassaaq, nunatsinni aningaaseriviit annersaat erseqqissaavoq.