Inatsisartut Allattoqarfiata sulisuusimasut isornartorsiuinerat ilisarinngilaa
Inatsisartut Allattoqarfiata Sermitsiaq.AG-mi allaaserisani arlalinni, sulisuusimasunit taakkulu kattuffiannit DJØF-imit, isornartorsiuinerit ilisarinngilai. Suliffimmi avatangiisit pissutsinit allaatigisaannit pitsaanerungaarput, nalunaarutigineqarpoq.
Inatsisartut Allattoqarfiata sulinermi avatangiisit ajortut pillugit nittartakkami aviisimut Sermitsiamut oqaatigineqartut ilisarisimanngilai. Tamanna Inatsisartut Allattoqarfiani pisortap Ellen Kolby Chemnitzip tusagassiuutinut nalunaarummi erseqqissarpaa.
- Inatsisartut Allattoqarfiata allattoqarfimmi sulisut pingaartippai ingerlaavartumillu suliffimmi avatangiisinik pitsaasunik pilersitsinissaq attassinissarlu sulissutigalugit. Inatsisartut Allattoqarfiata sulisut ilorrisimaarnissaat aalajangiisuusumik pingaartippaa.
Nittartakkami aviisimi Sermitsiami isornartorsiuineq pillugu Inatsisartut siulittaasuat Mimi Karlsen (IA) apersornerani allaffeqarfimmi sulisut atugaat misissorniarlugit oqarnikuuvoq.
- Inatsisartut Allattoqarfiat isumaqarpoq Sermitsiap allaaserisartagai qanga pissusiusimasunik siusinnerusukkullu sulisuusimasut suliffimmi avatangiisinik namminneq isiginninnerannik aallaaveqartut. Sermitsiap allaaserisartagaani Inatsisartut Allattoqarfianni suliffimmi avatangiisit ullumikkut atuuttut sunnguamilluunniit misissorneqarsimanngillat takussutissiorneqaratillu, allassimavoq.
Kattuffik tapersiisoq
Allattoqarfimmi sulisut atugaat pillugit kinaassutsiminnik isertuussisut arlallit oqaluttuaasa saniatigut Sermitsiap pissutsit uppernarsarniarlugit sulisut kattuffiat DJØF aamma attaveqarfigaa.
Johanne Nordmannip, Djøf Offentligimi siulittaasup aamma Djøf-ip Kalaallit Nunaanni ilaasortaanut sinniisuusup, uppernarsarpaa suliffimmi avatangiisit unammillernartuusut allattoqarfimmilu iliuuseqartoqartariaqartoq tikkuarlugu.
- Inatsisartut Allattoqarfiat ulloq 6. oktober 2023 suliffimmi avatangiisit pillugit Djøf-imut ilaasortanik ullumikkut sulisuusunik ataatsimeeqateqarpoq. Djøf-imut ilaasortat ullumikkut sulisuusut Inatsisartut Allattoqarfianni suliffimmi avatangiisinik Djøf-ip allaaserinninnera ilisarisinnaanngilaat. Djøf-imut ilaasortat ullumikkut sulisuusut nalinginnaasumik sulinertik nuannaralugulu ulluinnarni aqutsisuminnik ajornartorsiuteqannginnertik paasissutissiissutigaat, Ellen Kolby Chemnitz nassuiaavoq ataatsimiittoqarsimaneralu uppernarsarlugu.
Inatsisartut Allattoqarfiat suliffimmi avatangiisit pillugit sulisut kattuffiinit allanit saaffiginnissutinik allatigut tigusaqarsimanngilaq pisortap naqissuserpaa.
