Ilulissani kalaalimineerniarfik takornarianut saaffiginnittarfittut atorneqalissasoq
Takornarianut saaffiginnittarfik kalaalimineerniarfillu Avannaata Kommunianut annertuumik aningaasartuutaapput. Taamaattumik kalaalimineerniarfimmik nutaamik pilersitsinissaq kalaalimineerniarfillu takornarianut saaffiginnittarfittut atorneqarsinnaanera ilumut imminut akilersinnaanersoq misissorneqassaaq.
Kalaalimineerniarfik Ilulissaniittoq ukiorpassuarni atorneqartareerpoq. Tassani piniartut aalisartullu pisaminnik apuussisarput, pisiniat nuannaarutigeqisaminnik pisiniarsinnaasarlutik.
Ajoraluartumilli kalaalimineerniarfiup atorfissaminut atorneqartarnera annikittoq kommunalbestyrelsimi marsip ulluisa 25-anni ataatsimiinnermi oqaatigineqarpoq:
- Ilulissani kalaalimineerniarfik kommunimut annertuumik aningaasartuutaavoq atuisunillu iluamik atorneqarani tunisat akileraaruteqarnerat peqqutaatinneqartarluni, siunnersuummi allassimavoq.
Nutaamik kalaalimineerniarfiliornissaq aaqqiissutissaagunarpoq
Kalaallimineerniarfik kisimi annertuumik aningaasartuutaanngilaq, takornarianut saaffiginnittarfik aamma aningaasartuutaangaatsiarpoq, aningaasartuutillu annikillisinnissaanut periarfissanik ujartuisoqarnissaa kommunalbestyrelsimi ilaasortat misissuiffiginiarpaat.
- Kommuni takornarialerinermut saaffiginnittarfimmik Ilulissani pilersitsivoq, saaffinginnittarfik ingerlalluarpoq, kisianni kommunimut aningaasartuutaalluni. Kommuni illumik attartortariaqarsimavoq saaffiginnittarfimmik pilersitsissaguni illoqarfiup qeqqani periarfissat killeqarmata, siunnersuummi allassimavoq.
Allattoqarfimmiit inassutigineqarpoq kalaalimineerniarfimmik pisiniarfitoqqap tunuani sissamut sammisumi ullumikkut biilinut unittarfiusumi kalaaliaqqamik ammasumik pilersitsisoqassasoq. Kalaalimineerniarfik ammasoq ingerlatsinermut imermut, eqqiaanermut kallerup inneranullu aningaasartuuteqarfiginera annikittunnguussasoq ilanngullugu inassutigineqartumi tunngavilersorneqarpoq.
Millioninik ataatsinik akeqassasoq
Kalaalimineerniarfik nutaaq 1 millionit missaanik akeqassasoq, siunnersuummi allassimavoq. Kalaalimineerniarfimmik ingerlatsineq ukiumut 100.000 koruuninik akeqassangatinneqarpoq. Kommunillu takornarianut saaffiginnittarfimmut illumik attartornera ullumikkut ukiumut 168.000 koruuninik akeqarpoq. Kommuni isumaqarpoq taakku aningaasat sipaarutaassasut.
Kalaalimineerniarfik maanna atuuttoq ingerlannera akissarsiaqartitsinermullu ukiuni kingullermi 500.000 koruunit 600.000 koruunillu missaani aningaasartuutaasarpoq.
Avannaata Kommunia paasissutissiivoq kalaalimineerniarfik ukioq manna annertuumik sipaarniarfiunikuusoq imminut akilersinnaanngitsumk ingerlanneqarmat, atuisullu naapertorlugit sulisoqarnikkut nalimmassarneqarluni, taakkua sipaarneqassasut kommuni allappoq.
Kommunalbestyrelsi isumaqataasoq
Nutaamik kalaalimineerniarfiliortoqassasoq, taannalu naammassippat maannakkut kalaalimineerniarfiusoq takornarianut saaffiginnittarfinngussasoq Avannaata Kommuniani kommunalbestyrelsi tamarmiulluni isumaqatigiippoq.
Aningaasaqarnermut ataatsimiititaliaq maanna aningaasalersuinissamut suliaqassaaq, taamaalioreerpatalu aalajangissallutik.
