Ikummatissat akii pingasunngornermi qaffassapput

KNI A/S-imiit tusagassiuutitigut nalunaarutigineqarpoq ikummatissat akii literimut 60 øre-mik 3. aprilimiit allanngortinneqarmata.

- KNI-p ikummatissat akii ukiunut arlalinnut qularnaartarnikuullugit, maannakkut ikummatissat qularnaarnissaat akisunerussammat akit allanngortinnissaat pisariaqarpoq. 

Taamaalillunilu ikummatissat qanoq pineqassanersut piffissami sivitsortumi pissangassutigineqartoq paasinarsivoq. Ukiunimi arlalissuanngortuni nunatsinni ikummatissat aalaakkaasumik akikitsumillu inissisimatinneqarsinnaasimapput. Ilaatigut nunarsuup sinnerani akii annertoorujussuarmik qaffatsinneqartarsimagaluartut. Akit aalaakkaasumik appasittuusimanerannut pissutaavoq KNI-p akit pillugit ukiunut arlalinnut atuuttussamik isumaqatigiissuteqarsinnaasarsimammat, taamaammallu aamma isumaqatigiissutit naammata naatsorsuutigineqareerluni isumaqatigiinniutigineqaqqittussaasut.

Sinneqartoorutit tapiissutigineqarput

KNI-mit erseqqissaatigineqarpoq akitsuerujussuarnissaq pisariaqarsimanngitsoq ukiuni kingullerni sinneqartoorutaasarsimasut iluaqutigalugit qaffaarujussuarnissaq pisariaqartinneqarsimanngimmat:

- Naalakkersuisut isumaqatigereerlugit aalajangerneqarpoq ukiuni kingullerni KNI A/S-ip sinneqartoorutigisarsimasai, ilaatigut takornariat amerlasuut tikittarsimanerannik tunngaveqartumik, atuisunut akigitinneqartunut qaffatsaaliutitut atorneqassasut.

- Taamaattumik akit maannakkut akigititavut nunarsuarmi tamarmi akigitinneqartut maannakkut atuuttut naapertorlugit akitsuusertinnagit danskit akigitiligaannit literimut 2,50 DKK-t missaanniittunik suli appasinnerupput. Ikummatissat akii nutaat piffissami 2012-imiit 2021-mut atuuttunit aamma appasinnerupput.

Akit nutaat

Matuma siulianiittut tunngavigalugit akit ulloq 3. april atuutilersumik ima akeqalissapput:

Benzin literimut 5,00 kr.

Gasolie literimut 5,15 kr.

Petroleum literimut 5,26 kr.