INUIT ATAQATIGIIT
IA aasaru Aasianni ataatsimeersuassaaq
Kingullermik partiip ataatsimeersuarnera 2021-mi pivoq, tassani covid-19-mi tuniluuttoqarnerpaaffianiippoq, taamaammat ataatsimeersuarneq taanna kinguartinneqarluni Qaqortumit Nuummut nuunneqarluni. Maannali partiip pilersaarutigaa juulip 20-anni aamma 21-anni ataatsimeersuartoqassasoq, taannalu Aasianni pisussanngorlugu pilersaarusiorneqarpoq.
Annonse
Múte Bourup Egede, nunatsinni partiit annersaanni, Inuit Ataqatigiinni, siulittaasutut qinigassanngorteqqippoq. Tamanna Sermitsiap nittartakkatigut nutaarsiassaqartitsivianut oqaluttuaraa.
Múte Bourup Egede partiimi 1. december 2018-miilli siulittaasuuvoq, taamani Sara Olsvig siulittaasutut tunuarmat.
Múte Bourup Egede kingullermik Inatsisartunut qinersinermi apriilimi 2021-mi 3.385-inik taaguunneqarpoq partiinilu ajugaatippaa 9.933-nik taaguunneqarmat, unammillertagatoqaa Siumut siuarialaaraluarluni taamaallaat 7.986-inik taaguunneqarluni partiini annerpaamut tullinngortoq.
Partiit taakku marluk ukiorpassuarni unammiuartuupput, qinersinerulli kingorna illuatungeriittarnerit unitsillugit suleqatigiinnissamik isumaqatigiissuteqarput 12. apriili 2022-miillu naalakkersuisooqatigiilerlutik.
Qinersineq kingusinnerpaamik 6. apriili 2025
Maannamut partiimi siulittaasussatut sassartumik tusagaqanngilagut. Múte Bourup Egede siulittaasutut tullissaani Inatsisartunut qinersisoqalerpat, kingusinnerpaamik 6. april 2025-mi pisussami partiip sassartitaani siuttuujumaarpa? Tamanna paasinarsissaaq, partiip ataatsimeersuarnera 20. -21. juli 2024-mi Aasiaanni ingerlanneqartoq naammassippat.
Ataatsimeersuarnissaq nalunaarutigineqaqqammertoq Sermitsiap nittartakkatigut nutaarsiassaqartitsivianit Bourup Egedemut apeqqutigaarput politikkikkut anguniakkat inuiaqatigiinnullu sullissinermi suliat tulleriaarneri allanngortinneqassanersut:
- Ataatsimeersuarnermi kingullermi politikkikkut suliassatut aalajangiunnikuusagut nalilersussavagut killiffissiorlugillu, taamatuttaaq ingerlaqqinnissamut innersuussutinik suliaqassaagut.
- Maannamut suliniutitta naalakkersuinikkut siunnerfissatut aalajangiussimatta ilai naammassisimalereerpagut, kisianni suliniutitta nanginneqarnissaat pillugu partiip iluani oqaloqatigiinnerit naammassineqannginnerini, annerusumik oqaaseqarusunngilanga, taamaallaat ataatsimeersuarnissarput qaqugu sumilu pissanersoq aammalu uanga siulittaasutut ingerlaqqikkusullunga sassassamaarnera oqaatigigallaannassavakka.
