PEQQINNISSARQARFIK
Eqqunngitsunik paasissutissiisarneq paatsuuinerillu akiorneqassapput
Eqqunngitsumik paasissutissiisarnerit, paatsuuinerit aammalu innuttaasut peqqinnissaqarfiillu akornanni tatiginninnginnerup akiorniarnera, Peqqissutsimut Naalakkersuisup Agathe Fontainip sulissutiginiarpaa. Ingammik inuit attaveqaqatigiittarfiisigut peqqinnissaqarfimmi sulisut isornartorsiorneqangaartarput.
Annonse
Inuit attaveqaqatigiittarfiisigut peqqinnissaqarfimmi sulisut qanoq malersorneqartarnerat, Kalaallit Nunaanni Nakorsat Kattuffiata peqqinnissamut politikkimut ataatsimiititaliaata allakkani ammasuni allaaseraa.
Agathe Fontainimut allagaq ammasoq misigititsingaatsiarpoq, taannalu maanna taamaattoqartarnera pillugu qanoq pinaveersaartitsisoqarsinnaanera pillugu oqaloqatiginnikkumalluni, ataatsimiititaliap ilaasortaanik ataatsimeeqateqarusuppoq.
- Allagaq uannut misigititsingaatsiarpoq, aammalu suliffigisaq suliallu internetsimi inuit attaveqaqatigiittarfiisigut iliuuseqarfigisinnaanngisamik isornartorsiorneqartillugit oqimaaqutsiisinnaatigisoq pakatsinarsinnaatigisorlu isumaqatigilluinnarlugu, Peqqissutsimut Naalakkersuisoq tusagassiuutinut nalunaarummi oqarpoq.
Killiligaanani oqaaseqarsinnaatitaaneq
- Inuiaqatigiinni killiligaanani oqaaseqarsinnaatitaaneq annertuvoq. Tamannalu qujarutissaavoq. Napparsimasut qanigisaasullu misigisaminnik internetsikkut inuit attaveqaqatigiittarfiini allaaserinninnissaminnik pisinnaatitaaffeqarput. Akerlianillu napparsimaveqarfinni sulisut nipangiussisussaatitaallutik, Agathe Fontain oqarpoq erseqqissaallunilu:
- Napparsimaveqarfimmi sulisunut ataqqinnissusera annerpaaq anngukkumallugu periarfissaq una atorusuppara, ullulu tamaasa suliarisartagaannik, amerlanertigut erloqinartunik, nersorusullugit.
Periuseq tamanna inunnik malersuineq internetsikkut inuit attaveqaqatigiittarfiini periuserineqartoq, Agathe Fontainip akuersaarnianngilluinnarpaa.
- Napparsimaveqarfimmi sulisut internetsikkut inuit attaveqaqatigiittarfiisigut malersorneqarnissartik annilaangaginagu, inuiaqatigiinni kikkut tamaasa assigalugit suliassaminnik aallussiartorlutik suliartorsinnaatitaasussaapput, oqarpoq.
Maalaaruteqarnissamut aqqutissat pisortatigoortut
Napparsimaveqarfimmi nakorsartinnermut imaluunniit sullinneqarnermut maalaaruteqarniaraanni, maalaaruteqarnissamut aqqutissat pisortatigoortut malinneqarnissaat kajumissaatigaa.
- Taamaaliornikkut maalaarutigisaq maalaarutinik allattorsimaffimmut aatsaat ilanngunneqassaaq. Sullissivik.gl aqqutigalugu maalaaruteqarnissamut aqqutissat atuarneqarsinnaapput, ilisimatitsivoq.
