SIUNNERSUUT TUSARNIUTIGINEQARTOQ
Elcykelinut inatsisit nutaat atulersinneqalersut
Elcykelit knallertitut nalilerneqartarunnaassapput. Tamanna nalunaarummi nutaami, Namminersorlutik Oqartussanit suliarineqarsimasumi, allanngortinneqassaaq.
Annonse
Sikkilit innaallagiatortut knallertitut imaluunniit motorcykelitut nalilerneqartarput, apeqqutaalluni motorip innaallagiatortut qanoq sukkatigisumik ingerlasinnaanera. Sikkilit innaallagiatortut nalunaaquttap-akunneranut 30 kilometerit sinnerlugit ingerlasinnaasut motorcykelitut isigineqarput, taakkulu nunatsinni inerteqqutaapput.
Nalunaarutip nutaap sikkilinik innaallagiatortunik sukkasuunik atuisunut iluaqutaanavianngilaq, siunissamimi sikkilinik innaallagiatortut nalunaaquttap-akunneranut 25 kilometerit angullugit sukkassuseqarsinnaasut taamaallaat atugassatut akuerineqassammata.
Politiit kissaataat
Kalaallit Nunaanni Politiit aamma Ineqarnermut Attaveqaqatigiinnermullu Naalakkersuisoqarfiup kissaataat tunngavigalugu Kalaallit Nunaanni aqqusinermi angallannermi inatsisit nutarterneqarnissaat pillugu Attaveqaqatigiinnermut Ataatsimiititaliaq sikkilit innaallagiatortunut malittarisassat nutaat suliarisimavaat.
- Nalunaarut nutaamik malittarisassaliorpoq, tassani nassuiarneqarluni sikkilit innaallagiatortut suunersut. Nassuiaammi ilaatigut allassimavoq elcykeli 750 watt tikillugu sakkortutigisariaqartoq, aamma sukkanerpaamik 25 km/t-mik ingerlasinnaasuussasoq, Naalakkersuisut nittartagaanni tamanna atuarneqarsinnaavoq, tassanilu tusarniaanermut siunnersuut tamaat atuarneqarsinnaalluni.
Aammattaaq allassimavoq sikkilit innaallagiatortut nalunaarummi sikkilinut piumasaqaatit naammassisariaqaraat, aamma sikkilit innaallagiatortut atorlugit angalagaanni niaqorornaveeqqut atortariaqartoq.
Piumasarineqartunut ilaavoq sikkilit innaallagiatortut ingerlasinnaanissaat, tamannalu nalunaarummi imatut oqaatigineqarpoq:
Pisulluni atorsinnaasut
“Sikkili innaallagiartortoq ingerlasinnaassuseqartariaqarpoq, taamaalilluni sikkilip motooria sukkassuseq 6 km/t inorlugu ingerlasinnaanngorluni, naak tukkarfiit assigisaallu atorneqanngikkaluartut, innaallagissamik attaviup, soorlu aqumiittoq naqitsisartoq imaluunniit tigummiaq kaavittulik aqunneqarsinnaassalluni."
Apriilip 18-iat tusarniaanermut killigitinneqarpoq, pilersaarutaavorlu malittarisassat nutaat ukioq manna juunip aallaqqaataanit atuutilissasut.
