Dronning Margrethe inuuimmini matoqqasumik nalliuttorsiorpoq

Dronning Margrethe ullumikkut 84-inik ukioqalerpoq, nalliuttorsiornerlu ukiorpassuarni nalliuttorsiutigineqartarsimasunit allaanerulluinnarpoq.

Ukioq manna januaarip 14-ianni dronning Margrethe pisortatigoortumik tunuarpoq erninilu kunnginngortillugu.

Ullumikkut inuuissiornera aalajangerneranut ersiutaavoq.

Siorna dronning Margrethe ileqquusoq malillugu Amalienborg Slotimi takkuttunut aalateraluni erfalasunik nalliuttorsiutigineqarluni 83-inik ukioqalerpoq.

Ukioq manna balkonngimukassanngilaq.

Dronning Margrethe Fredensborg Slotimi 84-inik ukioqalerluni matoqqasumik inuuissiorpoq. Naak matoqqasumik nalliuttorsioraluartoq, inuuissiornera malugiuminassaaq.

Pisortatigoortumik erfalasulerfik

Dronning Margrethep inuuissiornera ullormi pisortatigoortumik erfalasulerfiusumi nalliussineqassaaq, taamaattumillu nuna tamakkerlugu erfalasoqassaaq.

Aamma Fredensborg Slotimi nalunaaqutaq 12.00 paarsisut taarserneqarnerannut atatillugu Den Kongelige Livgardes Musikkorps tusarnaartitsilaassaaq.

Københavnimi utoqqaat illuiniittut aamma dronningip inuuissiornera nuannaarutigaat, utoqqaat illuinut amerlasuunut kaaginik akeqanngitsumik agguaasoqassammat.

Tassa Københavnimi Bagerlaug, 2020-mili inuuissiorneq taamatut nalliuttorsiutigisarpaat.

Coronap nunarsuarmi tuniluunnera pissutigalugu dronningip inuuissiornerminut atatillugu innuttaasunut artornartorsiortunut naasunik nassiussisoqarnissaanik qinnutiginninnera pillugu taamaaliortoqartalerpoq.

Københavnimi iffiortut naasunik nassiussinatik utoqqaat illuinut kaaginik nassiussipput. Maanna tallimassaa taamaaliorput.

Dronning Margrethep inuuissiornera balkonngimi inuppassuarnit nalliuttorsiutigineqartussaanngilaq.

Kunngi Frederik balkonngimi

Taamaattorli Kunngi Frederik maajip 26-ani 56-inik ukioqaleruni anaanami inuuissiortilluni ukiut tamaasa qeqarfigisartagaanut balkonngimut anillassaaq, inuuissiornermini kunngiunerminilu siullermeerluni.

Dronning Margrethe ukiuni 52-ini dronningioreerluni januaarimi inuulluaqquneqarpoq, erninili kunnginngortikkaluarlugu suli dronningitut taaguuteqarpoq.

Aningaasaqarnermut tunngatillugu aamma dronningip tunuarnera sunniuteqarpallaanngilaq.

Kunngikkormiut aningaasanik amerlanerusunik tunineqartarnissaannik qanittukkut Danmarkimi naalakkersuisut siunnersuuteqarput.

Dronning Margrethe 12 millionit koruuninik immikkoortitsissunneqassasoq siunnersuummi allassimavoq.