DMI: Seqernup pulanera alutornangaartoq takuneqarsinnaassagunartoq
Seqernup pulanera allaaqqissappat pissanganarlunilu alutornassasoq DMI-mi silasiortoq ullumi seqernup pulanissaa pillugu oqarpoq.
Ataasinngornerup unnukkuani silassaq atorsaasussaavoq, assersuutigalugu Nuummiut innuttaasut seqernup pulanissaa takusinnaassavaat.
Seqerngup "pulanerpaaffissaa" nal. 18.34 pissaaq, 20 gradit missaannik qutsinnerusoq qiviarlugu kimmut/kujataata kitaanut takuneqarsinnaassalluni. Allaaqqikkumaartoq neriuutigineqarpoq:
- Seqernup pulanera pissanganarluinnassaaq neriullutalu alutornangaassasoq – sila atoruminassappat!
- Seqerngup pulanera Amerika Avannarlermi ullumikkut alutornangaartumik takuneqarluarnerpaasinnaagaluartoq Nuummi seqernup pulanerata 50 procentingajaat takuneqarsinnaassaaq, Rasmus Stoltze Hansen Sermitsiamut allappoq.
Takuneqaqqatussinnaagunartoq
Seqernup pulanera takuneqarsinnaassanersoq ilimanaateqarpallaanngitsoq aamma oqarpoq. Seqernummi pulanerata nalaani seqineq tarrissammat.
Soqutiginnittut periarfissaqarunik nunap qaavanukarlutik takuniaaqqullugit silasiortup kajumissaarpai. Taamaaliornikkut seqerngup qaammatillu takunissaat illut akornanniinnerannit periarfissaqarluarnerummat.
- Seqernup qinngornerinut illersuutaasunik isarussanik atuinissaq eqqaamaqqunarpoq. Seqineq illersuuteqarani isigigaanni isinik ajoqusertoqarsinnaavoq - seqinersiutit seqerngup qinngornerinut illersuutitut naammanngillat.
- Allaaqqinnissaalu siullertut neriuutiginissaa pingaarnerpaavoq, Rasmus Stoltze Hansen oqarpoq. Taassumalu soqutiginnittut kaammattorpai silassamik ilimasaarut DMI.dk-mi malinnaaffigeqqullugu.
Allaaserisap matuma allanneqarnerani DMI-p Nuummi seqinnarinnissaa ilimasaarutigaa Paamiunili kujataatungaanilu ajoraluartumik qulisimanerussalluni.
Seqernup pulanera Nuummi 50 procentip missaaniissasoq naatsorsuutigineqarpoq, avannarpasinnerujartortilluguli annikilliartussalluni.
