Biilersinnaanermut allagartartaarnissamut piffissat nikingasorujussuit
Qaanaami Upernavimmilu biilersinnaanermut allagartartaartitsisinnaaneq politiit ajornartorsiutigaat, Kalaallit Nunaanni Politiinit paasissutissat tunngavigalugit taama Naalagaaffiup politiivi ilisimatitsipput.
Kalaallit Nunaanni sumiiffiit ilaanni biilersinnaanermut allagartamik pissarsinissaq ukiup ataatsip missaanik sivisussuseqarsinnaasoq, Inatsisit tunngavigalugit inatsisinik atortitsinermut ministerip Peter Hummelgaardip IA sinnerlugu Folketingimut ilaasortamut Aaja Chemnitzimut akissutaani allassimavoq.
Kalaallit Nunaanni illoqarfiit annerit avataani biilersinnaanermut allagartartaartitsisoqartarnera qaqutigoortoq, Kalaallit Nunaanni Politiit ilisimatitsipput.
Nunami sumi najugaqarneq apeqqutaalluni qanoq akulikitsigisumik biilersinnaanermut allagartartaartarnerit akissutissami takusinnaavat:
Nuuk: Tunngaviusumik sapaatip-akunneri tamaasa
Qaqortoq, Sisimiut, Aasiaat, Ilulissat aamma Tasiilaq: Agguaqatigiissillugu sapaatip-akunneri pingasut-sisamakkaarlugit.
Illoqarfiit allat: Illoqarfinni minnerusuni, soorlu Ittoqqortoormiini, akulikissusai ukiup ataatsip tungaanut nikerarput, illoqarfinnilu anginerulaartuni, soorlu Paamiuni Maniitsumilu, qaammat ataatsip qaammatillu pingasut iluani.
Pingaarnersiuineq
Illoqarfiit annerit avataani biilersinnaanermut allagartartaarnissamut utaqqisoqarsinnaasoq, Kalaallit Nunaanni Politiit ilisimatitsipput. Politiit sivikitsuinnarmik ilinniartinneqarsimasut biilersinnaanermut allagartartaartitsisartuupput.
- Biilersinnaanermut allagartartaartitsisartunik politeeqarfik qanoq amerlatigisunik peqartiginera, aamma Kalaallit Nunaanni Politiit suliassanik pingaarnersiuineri apeqqutaallutik politeeqarfinni minnerusuni qanoq akulikitsigisumik biilersinnaanermut allagartartaartitsisoqarsinnaanera nikerarpoq, ilaatigut nunatsinni inuiaqatigiinni isumannaallisaanermut tunngasunik suliassat eqqarsaatigalugit, akissummi allassimavoq.
Qaanaami Upernavimmilu ajornartorsiut Kalaallit Nunaanni Politiivinit aaqqinniarsarineqartoq erseqqissarneqarpoq.
Kalaallit Nunaanni Politiit akissutaat pillugu Inatsisinik atortitsinermut ministeri Peter Hummelgaard ima oqaaseqarpoq:
- Biilersinnaanermut allagartartaarnissamut periarfissat Kalaallit Nunaanni Politiinit sammiuarneqarnissaat soorunami pingaaruteqarpoq, aamma Kalaallit Nunaanni illoqarfinni minnerusuni innuttaasut najugaqartut utaqqinerisa sivisuallaannginnissaat qulakkeerniarlugu Kalaallit Nunaanni politiit sapinngisaminnik iliuuseqartut isumaqarpunga. Qaanaami Upernavimmilu biilersinnaanermut allagartartaarnissamut misilitsinnissamut tunngatillugu unammilligassat aaqqinniarlugit Kalaallit Nunaanni Politiit suliniuteqartut tamatumunnga atatillugu maluginiarpara.
