Atuarfimmi aserorterisoqarsimammat atuarfik matoqqasoq
Atuartut hunnorujulikkaat ullumikkut atuanngillat, Sisimiuni Nalunnguarfiup Atuarfiani aserorterisoqarsimammat.
- Nalunnguarfiup Atuarfia ullumikkut marlunngornermi matoqqavoq aserorterisoqarsimanera peqqutigalugu.
Taama atuarfiup pisortaa Anna Lise Kreutzmann atuarfiup Facebookianut ullaap tungaa allalluni nalunaaruteqarpoq. Taamaalillutik atuartut 350-it sinnillit ullumikkut atuanngillat.
Ilinniartitsisut asaasullu torersaaleruttorneranni Sermitsiaq atuarfimmiippoq.
- Ajoq, atuarfiup pisortaa Anna Lise Kreutzmann Sermitsiap naapikkamiuk taama oqarpoq.
Ilinniartitsisut ullaap tungaa atuarfimmi torersaapput, aserorterinerlu unnuaq pisimasinnaavoq.
Pisortap oqaatigaa igalaanik matunillu aserortoqarsimanngitsoq, pisattanilli aserorterinerusoqarsimalluni. Politiit ullaap tungaa misissuillutik atuarfimmiipput.
Qeqqata Kommuniani borgmesteri Malik Berthelsen, kommunimi pisortaaneq ilinniartitaanermullu pisortaaneq ilagalugit atuarfimmiittut Sermitsiap naapippai.
- Alianaqaaq, taamak naatsumik borgmesteri Malik Berthelsen Sermitsiamut oqarpoq.
Anna Lise Kreutzmann paasissutissiissutigaa atuarfik aqagu pingasunngornermi ammaqqissasoq.