Attassinissamut Siuariartornissamullu Pilersaarut malinneqanngilaq

Inatsisartut aningaasaqarnermut akileraartarnermullu ataatsimiititaliaat aningaasaqarnermut akileraartarnermullu Naalakkersuisumik Erik Jensenimik (S) attassinissamut siuariartornissamullu pilersaarut 2-mi suliniutinik aaqqissusseqqinnerni siunnerfinni takuneqarsinnaasunik, sukumiisunik atuutilersitsinerit, tassani piffissamut pilersaarutit atuutilersitsinernillu aaqqissuussinernut pilersaarutit kiisalu sulianik ingerlatsinermi isumalluutit, attassinissamut siuariartornissamullu pilersaarut 2-p naammassineqarsinnaanissaanut Naalakkersuisunit pisariaqartinneqartut akissuteqarfigiumallugit ammasumik ataatsimiigiaqqusivoq.

Inatsisartunilli aningaasaqarnermut akileraartarnermullu ataatsimiititaliaani ilaasortap Jens-Frederik Nielsenip Erik Jensenimit akissutisiani naammaginngilai.

- Naalakkersuisup akissutai naammaginanngillat. Ataatsimiinneq aallarnerlugu attassinissamut siuariartornissamullu pilersaarutip 2-p qanoq pingaaruteqartiginera, taassumalu siunissami qanoq pingaaruteqartiginera oqaluttuaraa, Jens-Frederik Nielsen (D) nalunaaquttap akunneranik ataatsimik sivisussusilimmik ataatsimiinnerup kingorna oqarpoq, ataatsimiinnerlu ataatsimiinnermik allamik malitseqartinneqassaaq.

-Inernernik allattuiffiunngilaq, Erik Jensen attassinissamik siuariartornissamullu pilersaarut pillugu oqarpoq, taannalu pilersinniakkannik suliniutinillu naalakkersuisoqarfiit allat, soorlu ilinniarnermut, aalisarnermut, inuussutissarsiornermut, ineqarnermut isumaginninnermullu tunngasuni oqartussaaffigineqartunik imaqarpoq.

Pisortat ingerlatsiviata aningaasartuutaasa annertuumik appartinneqarnissaannik, pisortallu isertitaasa, pingaarnertut namminersorlutik inuussutissarsiortut ingerlataqarnerunerisigut annertusineqarnissaannik, imminullu pilersornissamik piumassuseqalernissamik akuutitsisumillu atugarissaarnissamik siuariartornissamillu pisariaqartitsinermik taanna saqqummiussivoq.

-Aaqqissuusseqqittoqartinnagu aningaasaatigut kinguneqaatit 2027-mi ersissapput, tassani pisortat isertitaat aningaasartuutaallu imminnut ataqatigiikkunnaassapput, taanna oqarpoq.

Inatsisissatut siunnersuut pilersaarummut akerliusoq

Ataatsimiititaliami ilaasortat suliniutinut sukumiisunut, soorlu kalaallinik ilinniarsimasunik sulisussanik qanoq kajumitsitsisoqalernissaa, taakku inissaannik qulakkeernissaat il.il. apeqquteqarput, Erik Jensenilu pisortat ingerlatsiviannik pisariillisaanissamut tigussaasunik suliniutinik saqqummiussinnginneranik isornartorsiorlugu. 

Sooq Naalakkersuisut aalisarnermut inatsisissatut siunnersuummik attassinissamik siuariartornissamullu pilersaarummi siunertanut akerliusunik saqqummiussinerat Jens-Frederik Nielsenip ilanngullugu paaserusuppaa.

- Aalisarnermik inuussutissarsiortut aningaasaqarnitsinnut pingaaruteqarnerat pilersaarummi allassimavoq, aalisarnerlu ineriartortinneqassappat unammilleqatigiinnissaq pisariaqarpoq. ”Inuussutissarsiortut atugaat naammassinnissinnaassuserlu” pillugit aningaasaqarnermut siunnersuisooqatigiit policy briefiliorput, tassanilu inuussutissarsiortut naammassisinnaasallu siuarsarniarlugit aalisarnermi piujuartitsisumik ineriartornissami unammilleqatigiinnissamut atugassaqarluarnissaq allaaserineqarpoq, Jens-Frederik Nielsen oqarpoq. 

-Taamatullu aalisarnermi ingerlalluartut pitsaasumik sinaakkutitigut atugassaqarnermikkut ineriartornissamut periarfissaqartariaqartut. Taamaammat sooq Naalakkersuisut aalisarnermut inatsisissatut siunnersuummik, ilaatigut pilersaarummi siunertamut akerliusumik pisortanit pigineqartumik suliffeqarfiup annerulernissaanik siunnersuuteqarpat? Jens-Frederik Nielsen aperivoq.

Siunnersuutip sisamanngornermi ulloq 11. april Inatsisartuni suliarineqarumaarnera, Royal Greenlandillu namminersorlutillu ingerlatsisut assigiinngissutaannik nassuiaatitaqartumik siunnersuut saqqummiunneqassasoq, Erik Jensenip nassuiaatigaa.

- Tamatumani tunngaviusumik imminut napatinnissaq qularnaarniarneqarpoq, namminersortullu upperaagut, taamaattoq pisuussutit sapinngisamik siaruarsimalluarnissaannik oqariartuut attapparput, tamannalu sisamanngorpat itisilerneqarumaarpoq, Erik Jensen oqarpoq.

Jens-Frederik Nielsen malitseqaatitut ima aperivoq:

- Attassinissamut siuariartornissamullu pilersaarut sakkussaava Naalakkersuisut malitassaat? Naalakkersuisummi ataasiakkaat pilersaarummut akerliusumik iliuuseqaannarsinnaagunik, taava pilersaarut pappiaraannaassaaq siunertanik malinneqanngitsunik imaqartoq, Jens-Frederik Nielsen oqarpoq.

- Pilersaarut inernissanik allattuiffiunngilaq, tunngaviatigut Inatsisartut allaanerusunik isummersorsinnaapput allaanerusumillu siunnerfiliillutik, aningaasaqarnerulli imminut napatittup inuussutissarsiortullu nutaat isertitsiffiusussat qularnaarnissaat anguniagaavoq, tamannalu pilersaarummi qitiuvoq, Erik Jensen oqarpoq.