Ataatsimiititaliat maalaaruteqartarfiillu arlallit Namminersorlutik Oqartussat pisariillisarniarai
Naalakkersuisut nalunaarummi, nalunaarutinik allanik sisamanik atorunnaarsitsisumi, naammagittaalliuuteqartarfiit sullissinerat pisariillisarlugulu assigiimmik suleriuseqalernissaat siunertaraat.
Annonse
Maalaaruteqartarfiit arlallit suleriusissaannik Naalakkersuisut maanna inissititerisarput. Taamaasilluni aalajangiisartut maalaaruteqartarfiillu tamarmik immikkut suleriuseqarlutik.
Tamanna maanna allanngortussanngorpoq. Nalunaarummi nutaami tusarniaassutigineqartumi ataatsimiititaliani maalaaruteqartarfinnilu sukkanerusumik assigiinnerusumillu suleriaaseqalernissaq siunertarineqarpoq.
Pissusissamisuunngitsoq
- Maannakkut suleriuseq atorneqartoq pissusissamisooranilu ingerlatsinermi oqimaatsumik ingerlanneqarpoq, taamaattumik assigiimmik sukkanerusumillu aamma ajornannginnerusumik suleriuseqarnissaq kissaatigineqarluni.
Siunnersuut maalaaruteqartarfinnut, siunnersuummi eqqaaneqartunut, suleriusissaat namminneq inatsisitigut tunngavissaqarlutik inissititersinnaaniassavaat.
Nalunaarut nutaaq ataatsimiititalianut maalaaruteqartarfinnullu ukununnga kalluaassaaq:
- Unammilleqatigiinnermut Ataatsimiititaliaq
- Ineqarneq pillugu maalaaruteqartarfik
- Siusinaartumik pensionisiaqarnermut maalaaruteqartarfik
- Pinngortitap illersorneqarnera pillugu naammagittaalliuuteqartarfik
- Nalunaarutinut siunnersuutit nutaat suliarineqarnerini inatsisinik katersat atuutsinneqalernissaa siunertarineqarpoq, aamma nalunaarutini atuutsinneqareersuni allannguutissatut siunnersuutigineqartut allannguutigineqareerpata, annikinnerpaamik allanngueqqittoqartarnissaa siunertarineqarluni, paasissutissiissutigineqarpoq.
Tusarniaaneq apriilip 23-anut killeqarpoq.
