Ataatsimiititaliaq misileeqqippoq — tunngaviusumik inatsisissaq pillugu siunersiuinermut aggeqqusisoq
Tunngaviusumik inatsisissaq pillugu Inatsisinut Ataatsimiititaliap apeqqutimi ilaat Naalakkersuisunit akissutissarsiumavai, tamannalu ammasumik siunersuinermi pissaaq.
Annonse
Inatsisinut Ataatsimiititaliami ilaasortat arlallit siunersiuinermut pilersaarutaasumut peqataasinnaannginnerat pissutigalugu, tunngaviusumik inatsisissaq pillugu ammasumik siunersiuinissaq marsimi taamaatiinnarneqarpoq.
Siunersiuinermik tamatumuuna apriilip 22-ani pisussamik, Inatsisartut Inatsisinut Ataatsimiititaliaat aaqqissuussivoq.
Tunngaviusumik inatsisissaq pillugu naalagaaffinngornissamut apeqqutit arlallit naalakkersuisumit akineqarnissaat Inatsisinut Ataatsimiititaliap, ataatsimiititaliami siulittaasoq Anders Olsen (S) siuttoralugu, piumasaraa.
Tunngaviusumik inatsisissaq pillugu immikkoortut sorliit Naalakkersuisunit naammassineqanngitsutut immikkut isumaqarfigineqarnersut, itisilerlugit Naalakkersuisumit nassuiarneqassasut ataatsimiititaliamit kissaatigineqarpoq.
Sulinerup ingerlateqqinnissaanut innuttaasut qanoq Naalakkersuisut peqataatinniarneraat Ataatsimiititaliap aamma paaserusuppaa, Tunngaviusumik inatsisissaq pillugu isumalioqatigiissitaq nuna tamakkerlugu angalassasoq siornatigut Naalakkersuisut nalunaarnikuummata.
Ataatsimiititaliarsuaq atorunnaarsinneqareermat ataatsimiititaliap tamanna apeqquserpaa:
- Innuttaasunik peqataatitsinissamik suliaqarnissamut innuttaasullu peqatigalugit oqallinnissamut piffissaliussamik paasitinneqarnissani ataatsimiititaliap kissaatigaa, Inatsisinut Ataatsimiititaliaq tusagassiuutinut nalunaarummi allappoq.
Siunersiuineq Inatsisartuni apriilip 22-ani nal. 14-15 ingerlanneqassaaq, 15-illu tikillugit peqataasinnaapput. Siunersiuinermi tusarnaarniaraanni inissamik siumoortumik inniminniisoqartariaqartoq, ataatsimiititaliaq ilisimatitsivoq.
