Angut nakuusersimasutut peqquserluttuliorsimasutullu pinerloqqissagaluaruni pineqaatissinneqarsimasunut inissiisarfimmiittussassanngortinneqartoq

Angut 35-nik ukiulik Sermersuup Eqqartuussiviani poorski sioqqullugu eqqartuunneqarmat unnerluussutit 13-it eqqartuussutigineqarput.

Angut ukiuni arlalinni, 2019-imiit 2022-mi aggustip tungaanut, pinerlunnernik arlalissuarnik unnerluunneqarpoq, ullunilu pingasuni eqqartuussineq ingerlanneqarluni.

Angut unnerluutigineqartuni pingasuni eqqartuussivimmi pinngitsuutinneqarpoq — ilaatigut anaanani pillugu sioorasaarisimasutut, tillinniarsimasutut imigassamillu tillissimasutut pinngitsuutinneqarluni.

35-nik ukiulik pinerlunnerni qulingiluani pisuutinneqarpoq, pinerlunnermi allami ilaannakuusumik pisuutinneqarpoq, Morten Hvergel Kalaallit Nunaanni Politiit unnerluussisussaatitaasuat Sermitsiamut oqarpoq.

Nakorsaq tarngummik miloraa

Angut pinerloqqissagaluaruni qaammatini qulingiluani pineqaatissinneqarsimasunut inissiisarfimmiittussassanngortinneqarpoq, ukiunilu pingasuni misiligummik iperagaassalluni.

35-nik ukiulik peqquserluttutut ilaatigut pisuutinneqarpoq, Oddset-imi eqquiniaanermut kuponinik pisoqqanik akiliuteqarluni pisiniarfik 1.000 koruuninik annaasaqartissimagamiuk. Tamanna augustimi 2020-mi pivoq.

Aamma nakuusernerni sisamani pisuutinneqarpoq - arnamut nakuuserneq ataaseq, unnerluussummi allassimaneratut niaquatigut tilluarlugulu tukkarsimagamiuk.

Aammattaaq pisortani atorfilimmut nakuusersimasutut eqqartuunneqarpoq. Nuummi pinasuartumik nakorsiartarmmi nakorsamut, unnerluussummi allassimaneratut, nakorsap aalajangersimasumik nakorsaatinik tuniumanngimmani tarnummik gelemik milorsimagamiuk.

Eqqartuussiviup aalajangiinera illuatungeriinnit tiguneqarsimasoq unnerluussisussaatitaasuneersoq Morten Hvergel oqarpoq. Taassuma suliaq ukiorpassuarni suliarineqarsimasoq maanna naammassineqarmat aamma unnerluutigineqartoq unnerluussutit amerlanersaat malillugit eqqartuunneqarnera naammagisimaarpaa.